ETOS HAPARTOGION: Pamuro so Marumbalang

JAKARTA, BatakIndonesia.com — Angka dongan na liat na lolo. Taingot dope tahe turiturian ni Si Piso Malim, sada jolma na sumalin skatina i? Molo tung pe taingot dope, huadarhon ma jolo deba sarito i tu hita.

Hanohonna, di sada tingki, disuru inongna ma Si Piso Malim mandiori huta ni tulangna huhut laho mangaririt boru ni ibotona i bahe parumaenna. Di na mandiori huta ni tulangna Si Piso Malim, mangulon ma ibana di tongan dalan huhut martapian di batang aek na adong disi. Di na martapian i ibana, sipsip ma dibuat hatobanna i pahean dohot piso ni Si Piso Malim i laos mamangkehonsa. Alani, bali ma hasaktian ni Si Piso Malim i tu hatobanna i.

Dung sidung ibana martapian, diida ibana ma naung dipangke hatobanna i paheanna rap dohot pisona i solot di gontingna. Manigor muruk ibana. Alai, aha ma huasona, ai nunga hira sude pinda hasaktionna tu hatobanna i. Mamungka sian i, ibana ma na gabe hatoban ni hatobanna i hian.

Tep ma i, sahat ma nasida tu huta ni tulangna i. Ala naung nania leleng ndang hea nasida pajumpang, ndang apala ditanda tulangna i be rupa ni berena i. Toho ma antong, saut ma diparbere ibana Si Piso Malim dekadeka (palsu) i. Ianggo Si Piso Malim, na nuaeng gabe hatoban i, sai malengleng ma ateatena paidaida na masa i, so tardokna be agiaaha.

Alai, songon nidok ni umpama: “Samalomalo ni padidit manjangkit, sai na madabu do ujungna!” Di sada tingki, disuru tulangna ma ‘berena’ i mangingani eme na dijomur di alaman unang suda dituduhi manuk. Ala mondohondok ibana na mangingani i, suda ma eme i digulut manuk. Mamungka sian i, sungkunsungkun ma roha ni tulangna i di hasaktian ni berena naung tarbarita i.

Marsogotna i, disuru tulangna i muse berena i manjomur eme. Ala tong mondokhondok ibana, disuru ibana ma hotobanna i manggontihon ibana mangingani eme na dijomur i. Diparrohahon tulangna i do sude na masa i. Holan hundul do Si Piso Malim na tingkos i di jolo jabu, ndang adong agiasada manuk pe na mandonohi eme i. Marnida i, tubu ma tu roha ni tulangna i, jala mangkuling ma nang mudarna, mandok: “Sotung na i do berengku!?”

Dung dipatangkas tulangna i tarboto ma ise sasintongna berena. Dipaulak ma hasaktian ni berena i jala mulak hatoban ma Si Piso Malim dekadeka i.

Ra, tudos ma Si Piso Malim i tu Pamuro so Marumbalang na hudok di goar ni sarito on.

Ra, bo pe ndang adong be na marhasaktian songon hasaktian ni Si Piso Malim di na mangingani eme na dijomur i dohot poda na tur Pamuro so Marumbalang i, boi do taain i gabe tudosan tu relasi kerja uluan-sisean nuaeng on. Unang be sai tadok, rupani: “Ai so adong palisi, tu aha marhelem!?” Ndang rumang ni pangalaho na tingkos i. Ndang tudos hita tu pinahan na ingkon pajagajagaon asa atur. Taulahon ma hombar tu ulaonta. Unang tatanjungi na so parlangeanta. Haposan ma hita di angka ulaon na dipasahat tu hita.

Tu uluan pe, dos do nangkokna dohot tuatna. Saguru tu hapartogionna do pangulahonon ni siseanna. Molo tingkos do ibana manguluhon na ginonggomanna, tontu sahali siseanna pe biar (jaha: unduk) ma tu parentana. Unang antong tajom tu toru, majal tu ginjang. Alani, pamuro so marumbalang i ma konsep relasi kerja uluan-sisean na ringkot ulahononta di partingkian on. Molo songon i do, molo sisean do hita, haposan ma hita. Molo partogi manang uluan hita, marsahala ma hita, na so sijuaon ni sisean na taparentahon, disi manang so disi hita.

Penulis: Albiner Siagian (Sahalak parhalado di HKBP Perumnas Simalingkar; Guru Etos dohot Revolusi Mental na marbisoloit)

BACA:  Panut

Facebook Comments

Default Comments

Leave a Reply

Your email address will not be published. Required fields are marked *