ETOS MULAULON (1): Hajugulhon Mulaulaon

JAKARTA, BatakIndonesia.com — Angka dongan na hinaholongan! Naujui, dung sidung niombak balik hauma i, manigor pinatoho ma aek sian bondar. Hona rondam manang bornohan ma tano naung diombak balik i dohot aek so pola sirnip. Borgoborgo ma tano i. Dungkonni, martubuan ma angka gea, marukkori ma angka hirik, dohot angka sipasing. Angka haruting pe mananom ma disi ala bahat angka sipanganonna disi.

Dung i, huhut ma sinaburhon boni tu panamean dingkan suhi ni hauma i. Pinasombu ma tano i maraek hirahira sabulan lelengna huhut paimahon same i butbuton. Ugan ma antong tano i. Andorang so dirogo, digairi ma jolo. Sidung i, rade ma hauma i suanon eme!

Di nadipadiar hauma naung niombak balik i maraek sabulan, sai disonggopi sada horong pidong na menek ma i laho manjalahi sipanganonna. Goarna ima ‘Pidong Sipet’. Patna lihi, jarijarina ganjang jala talapakna bidang asa unang lusop ibana tu gambo i. Turbingna ganjang jala rantos. Tontu nunga marevolusi ibana hombar tu na mandiori ngolu, mangihuthon teori ni Amanta Charles Darwin (The Theory of Survival of the Fittest), na mandok na martahan mangolu i ma na lumobi pahombarhon dirina tu na humaliang (lingkungan).

Ia sipanganon ni pidong sipet i ima angka gea, hirik, sipasing, situma, dohot angka na asing na mian di bagas gambo i. Boha ma dibahen pidong i ummbotosa di dia ma angka sipanganonna i monjab? On ma unok ni sarito on: hajugulon.

Dung songgop ibana di atas ni tano i, manang dingkan dia pe, sian i ma dibuhai parburuon i. Dipanjukjukhonma turbingana tu tano i huhut digampit aha ma na dapotsa. Diulahi ma i muse mansai hojot. Olo do saratus hali manang saribu hali dipanjukjukhon pargutna i, alai olo do laos na saribu hali i ndang adong dapotsa. On ma na nidokna ‘atto atto sipet’. Ai so adong di ibana pangantusion di dingkan dia ma angka gea i mananom. Di hata Inggris didok ma i ‘Trial and Error’. Coba, gagal, coba-gagal, coba-gagal….., sahat tu na dapotan!

Domu tu na mulaulon dohot na marusaho, di Ilmu Psikologi, adong do pandohan ‘perseveranve.’ Perseverance means persistence in doing something despite difficulty or delay in achieving success. Sada hata tu pandohan on di hata Batak ima hajugulon. Ndang marnamantat. Sitongka mansadi saleieng so jumpang na niluluanna.

Adong muse do pandohan na tudos tusi di hata na asing, ima ‘grit.’ Mangihuthon Inanta Prof Angela Duckworth, na tongon sahalak pandebisuk psikologi, grit is defined as perseverance and passion for long-term goals. Dia so dia do lapatanni tu jajugulon mulaulaon.

Sian hasabaraon, hanunuton, hapadoton, hajugulon (na positip) di namandiori ngolu, tardokma pidong sipet i na sabar, na nunut, na padot, jala na jugul. Alai tutu, i ma silakkona, ndang marsiajar ibana teori marhemat di input-process-otput i. Tung mansai marhoihoi do ibana na mandiori ngolu i. Alani i ma, ra, tung so adong do pidong sipet na mokmok, ai mansai ringgas do ibana margerak-badan laho manggohi butuhana sisatonga-jongkal i.

Angka damang, dainang, haha-anggi nang na pinariboto! Denggan do ra tatiru hasabaron, hanunuton, hapadoton, dohot hajugulon ni pidong sipet i mandiori ngolu siapari, lumobi ma di jaman saonari on. Alai tutu, marbisuk ma hita, unang apala songon pidong sipet i. Tahaporseai do, tu angka sisongon i do dipasahat Debata pasupasuNa. Jala, taingot ma hata ni Bibelta i na mandok: “Ingkon hir hodokta mangalului ngolungolu!” Asingni, didok do: “Na so ra mulaulaon, unang ma ibana mangan!”

Dipargogoi Debata ma hita!

Penulis: Albiner Siagian (Sahalak parhalado di HKBP Perumnas Simalingkar; Guru Etos dohot Revolusi Mental na marbisoloit)

BACA:  Keterikatan vs Kebebasan pada Anak

Facebook Comments

Default Comments

Leave a Reply

Your email address will not be published. Required fields are marked *