Gareja dohot Pariwisata

JAKARTA, BatakIndonesia.com — Sabulan na salpu, marnonang ma hami dohot sahalak pandita di Parbaba, Samosir. Nasida ima pandita resor di HKBP Resor Parbaba. Parnonangin i na mulana manaringot hatauon ni angka parhalado, lumobi sintua, laos sahat ma tu na manigati pariwisata, topetna boha ma haparsidohoton ni gareja laho manumpahi (mendukung) pariwisata Danau Toba.

“Hupingkir, mansai denggan do paradeonta huria i laho patupahon program ‘Marpiknik so maninggalhon/mangalupahon parmingguon manang partangiangan. Ai na hubereng, mansai godang do angka na marpiknik tu Pasir Putih Parbaba on, na so marminggu be alani na marpiknik dohot marlangei di topi taon on. Hape, saganjang ni gala do dao ni Gareja Parbaba sian topi taon on. Boha molo dihobasi huria angka rumang ni parmingguon, partangiangan, manang perkemahan tu nasida? Ala, musengani, mansai denggan do partapahan ni gareja i tu angka ulaon sisongon i!”

Domu tusi, nantoari marretreat do punguannami, Punguan Raja Siagian Anak dohot Boru (PRSB) Sektor Simalingkar tu Lumban Bul Bul Tobasa. Di homestay na di jolo ni Gareja HKBP Eben Ezer Lumban Bul Bul i ma deba hami marborngin. Di acara naung ditotophon panisia, adong do kebaktian padang na naeng patupaon di alaman ni homestay i.

Ala topet do inganan i di jolo ni gareja i, hudok ma tu panisia: “Ua di gareja on ma hita kebaktian?” Pendek sarito, satolop ma hami tu usulhi.

Hudapothon hami ma uluan ni huria i laho manghatahon tahinami. “Ingkon martanggungjawab do na mamangke gareja tu kerbersihan, ala marsogot pukul 7 pangkeon do gareja on tu kebaktian pagi!” Manigor i do alusnasida. Nian, toho do i, alai hurang pas do alus i domu tu gareja songon inganan partangiangan/ibadah. Saut do hami partangiangan di bagas gareja i.

Ndang apala mardiaimbar sian Gareja HKBP Parbaba, HKBP Eben Ezer Lumban Bul Bul holan marholang tembok do sian topi pasir ingan parmeaman ni angka parpiknik na di Lumban Bul Bul i. Gariada, pudi ni gareja i manigor tao i nama. Jala, lambas do alamanna di pudi ni gareja i. Mansai une do i gabe inganan kemah-rohani ni angka naposobulung, rupani.

Alani, ninna rohangku, mansai une ma angka huria na tongon di inganan parpiknihan paradehon inganan dohot panghobasion tu angka parpiknik asa piknik mardalan dohot denggan jala marminggu ndang sundat, ai sai jotjot di Ari Sabtu dohot Minggu do nasida na marpiknik i.

Penulis: Albiner Siagian

Leave a Reply

Leave a Reply

Your email address will not be published. Required fields are marked *