Masa Ma Na So Dung!

JAKARTA, BatakIndonesia.com — Tung mansai tarsonggot do ahu majaha sada barita di pesbuk ni sahalak dongan bot ari on. Masa ma na so dung hea (be) masa. I ma na tubu tu rohangku alani.

Di si dipataridahon gombaran ni angka ina na dohonon ma marsaimara. Autsura ndang di’blurr’ gombaran i, tarida do angka na so patut idaon ni natorop di si. Tung salin ma tahe. Hurimpu do sarito naung robi angka sisongon i. Hape, nuaeng on, dingkan hutanami an, masa dope hape na so gabeak i.

Mangibuthon barita i, angka inanta i mangulahon i uju mangadopi angka patugas na mamungka dalan domu tu na ‘paulihon’ luat na humaliang Tao Toba i.

Sai manginongi ma rohangku. Boasa ingkon pola songon i? Hudok ma tu hita, molo pola sahat songon i diula angka inanta i, i ma tanda naung jut rohananasida mangadopi na masa i. Inama dihilala rohanasida dalan mampartahanhon haknasida. Ai sasintongna, na songon i ma hailaon na so tarpatudos di parompuan ni halak Batak, lumobi ma na maringanan di huta. Unang pola marsaimara, holan kamejana pe hurang tebur, nunga siinsahan i.

Alai, tubu muse ma tu rohangku boti: “Sotung do na adong manjujui nasida mangulahon i, saotikna pasombuhonsa?” Molo i do, tumibu ma nasida manguras jala marunte pangir tu Tao ni Sigapiton. Dungkon ni i, diunjomhon ma dirina tu toru tao i marsidokdohihon Batu na Jojo, asa unang mullop be.

Tu hamu pamarentanami tung mansai gogo nisosohon. Manat hamu maralohon (jaha: mangadopi) ruas(rayat)mu. Ai na tu ise do huroha na tinuju ni pembangunan i? Nda tu rayat do? Nda tu rayat na humaliang do, tarlumobi?

Huadarhon ma tu hamu na hea didok Amanta Mahbub ul Haq, na paisorangkon konsep pembangunan manusia i. Didok ibana songon on: “Sintuhu ni pembangunan i ima pahembangkon sipilliton ni rayat (enlarging the people choices).” Huhilala, ndang na pahembang dalan ngolu ni rayat molo songon i do. Na pahembang lage na rara (karpet merah) tu sigodang hepeng do songon i!

Anahon hamu ma!

Penulis: Albiner Siagian (Sahalak parhalado di HKBP Perumnas Simalingkar; Guru Etos dohot Revolusi Mental na marbisoloit)

 

Leave a Reply

Leave a Reply

Your email address will not be published. Required fields are marked *