MULAK MA TU UNOK NI NATAL I

Sarito na Marimpola di Minggu Adven (Tinongos Muse)

BatakIndonesia.com — Sasintongna, hira sarupa do na masa manang tupa di partingkian di hatutubu ni Tuhanta Jesus lobi 2.000 taon na salpu dohot na masa di partingkian natal sinuaeng on. Saotikna, adong dua horong na mansai andul na tupa di parsorang ni Jesus di Betlehem (Luat Judea), songon i ma tong nuaeng.

Horong na sada ima habodoon. Angka parmahan masuk ma tu horong on. Huhilala, ndang angka parsingkola nasida parmahan i. Angka sibuta huruf do i. Di bariba an ima horong na pistar. Angka parhapistaran na sian Purba masuk ma tu horong na pistar on. Nasida ima angka sititi ari dohot bintang. Mangihuthon tudutudu ni bintang do patolhas nasida sian Purba sahat tu huta Betlehem, Efrata. I ma ala ni pistar ni nasida. Molo nuaeng didok ma halak on ahli Ilmu Falak.

Na mangihut, di tingki i adong do halak na mansai burju jala denggan pangalahona. Angka parmahan, Si Maria, dohot si Josep masuk ma tu horong on. Angka parmahan i, datung diboto i diadia. Si Maria, sada ina na burju na sai tong mameop hata i jala pahusohusorhonsa di bagas rohana. Si Josep pe tong do songon i gabe tunggane doli na ‘siap siaga’ jala martanggungjawab gabe among ‘biologis’ ni Tuhan Jesus, so marungutungut manang so manihai. Raja Herodes na manampul ulu ni si Johannes Pandidi masuk ma tu tudosan ni horong na jungkat roha. (Raja on ma na manghaishon gara sian tanggurungna na mandok: “Ndang dapot ahu hasalaanNa!” Alai dipasahat do Jesus tu Panguhum Pilatus gabe alani diparsilanghon.)

Di paradongan pe tong do tarsagi gabe dua horong. Horong na pogos ima angka parmahan dohot keluarga ni Josep-Maria. Alani pogosna, ndang tarpatupa nasida nanggo lage nanang abit laho alas podoman ni Jesus na imbaru ditubuhon i. Ingkon pola ma marlagehon urame panggagatan ni dorbia i Tuhanta i, alani pogos ni among dohot inongNa. Sibaso manang bidan desa laho mangurupi parsorang ni Jesus pe ndang tarpatupa. Ndang apala binoto, boha ma dibahen si Josep manggotap tali pusok ni Jesus ujui. Ra, bulung ni urame manang ri do dibahen ibana, so marantitetanus. Hape si Kesar Agustus dohot si Raja Herodes marlobilobi, marlagehon sere dohot perak.

Di partingkian si nuaeng on, di namamestahon Ari Natal hita, tong do tupa na dua horong i. Torop dope nuaeng jolma na so hea marsingkola, na so umboto surat, na gotap parsingkolaanna di paralangalangan, na tu pargadisan ala ni habodoonna. Hape, di baribana tung mansai godang do jolma na sun pistarna, marganjangganjang titel i pola dua baris molo dipatitir, di jolo dohot di pudi ni goar samadak i.

Boha angka na burju? Suang songon i do tong. Bo pe hira na gumodang do angka na jungkat jala na takkang roha, alai angka na burju roha ndang hurang toropna. Bahat do nuaeng manisia na saluhut ngoluna dipelehon gabe pasuspasu tu hajolmaon, isara ni na mangurupi angka na tarduru ala ‘korban’ hamajuon on, na manganturehon angka na so-marama-so-marina, na mamelehon artana mangurupi angka na pogos, na mamangke angka talentana tu angka rumang ni hadengganon tu dongan jolma. Amanta, Bill Gates, parkomputer na utusan i, boi ma ra sada tudosan ni horong na burju on.

Molo horong na takkang roha, ndang tarpajojor ahu i, alani bahatna. Adong siahut na so niula ni hodokna, adong siginjang roha na sungkot ro di langit ginjangna, adong na mangaleai donganna na so sahorong, adong na manindos na gale, jala adong na manghilala mangambii na manompa ibana. Tapajojor ma di bagas rohanta angka jolma na masuk tu horong on. Ndang siat salembar harotas ganjang ni gurithononhon.

Songon i ma nang horong na pogos di sada suhi dohot horong na mora di suhi na asing. Mangihuthon hatorangan ni World Food Program (WFP), sada lembaga PBB na mangaringkoti sipanganon ni sandok manisia di liat portibi on, nuaeng on, adong hira 1 miliar (sa par pitu) manisia di portibi on na bongot tu podomanna ganup borngin dohot panghilalaan na male, ala ni sipanganon na soada manang hurang. Hape, mangihuthon hatorangan ni pigapiga pihak, tebateba ni sipanganon ni na mora, tuk mangalehon na anturaparon i mangan. Asing dope molo dietong angka pelor ni angka sordadu na marporangi mamunu donganna jolma. Molo dohot i dietong, datung adong be jolma na so dapot mangan dohot na putus singkola ala ni na so adong bahenonna manggarar uang singkola.

I ma portibi! Sai tong do masa na dua horong i. Tu hita, na rumingkot ima boha ma hita, di hadirionta ganup, gabe manghorhon hadengganon tu dongan jolma. Hudok ma tu hita, ndang na so boi Tuhanta Jesus ditubuhon di Rumah Sakit di Penang, Singapur, dohot di Ruma Sakit na tarbarita di portibi on, diurupi angka doktor dohot bidan na pistar. Apala ura do i di Ibana. Alai, ndang i ditodo. Bara ni pinahan, borngin na holom marimpotimpot, dohot alogo na mansai ngali manodos ro di holiholi do. Ndang adong gabagaba, ndang adong lilin dohot lampu listerik na marhillonghillong, ndang adong dekorasi na marnoninoni, ndang adong uninguningan manang parhinsloan sabangunan dohot parendena (artis), ndang adong pahean na jeges, ndang adong salon manggana bohi dohot sitarupon, ndang adong snack na paro ijur, ndang adong kata sambutan na marganjangganjang, ndang adong tamue na ingkon pahundulon di jolo jala ingkon paimaon harorona, ndang adong christmas gift, ndang adong tonel, ndang adong deklamasi, jala ndang adong spanduk na pahebahebahon. Na adong ima borngin na hohom, ende ni parmahan dohot surusuruan, bara ni pinahan na angir, soara ni hirik, dohot parhapistaran na sian Purba na marsomba huhut na mamelehon pelean na mansai arga.

Alani angka damang dohot dainang, tapaulak ma tu unok ni natal i. Ndang apala mandok songon na masa na 2.019 taon na salpu i ma tapatupa molo marnatal hita. Denggan do bage paheanta i. Alai, taingot ma hatutubu ni Jesus maralo do i tu pesta na marlobilobi.

Selamat Advent II. Taungkap ma bagasta, taparade ma lagenta. Etak tung beha ro Ibana martamue laos rap dohot hita manginum hopi dohot marsipanganon, tasaok hian ma patumona ni hopinta i jala unang jolo tagadis manukta na martagan i. Molo tung hurang tonggi pe hopi i, tadok ma: “Jesunami, santabi bolon ma hurang tonggi hopi on, ala nunga maos dipaingot parpuleher hami asa mangorom gula alani sahit gula on!”.

Manigor dohononNa ma: “Haradeonmi do na pamalumhon ho!”

Selamat Adven III!

Penulis: Albiner Siagian (Sahalak parhalado di HKBP Perumnas Simalingkar; Guru Etos dohot Revolusi Mental na marbisoloit)

BACA:  Miris, Kunjungan Raja dan Ratu Belanda ke Danau Toba yang Sudah Tercemar

Facebook Comments

Default Comments

Leave a Reply

Your email address will not be published. Required fields are marked *