Serial Kearifan Batak (14): Shared-Space and Sharing Understanding (2. Sidung): Meja Makan sebagai Ruang Berbagi

JAKARTA, BatakIndonesia.com — Tutu situtu, nuaeng on nunga tung gale angka rumang ni na marsaor di rumatangga di halak Batak (na marnonang, marpollung, manang na marsirarion). Gariada, adong do sakeluarga na di bagasan sadari-saborngin ndang hea nasida manghatai. Songon i ma tong nang tu keluarga manang sisolhot na asing. Adong do natoras na borhat tu parkarejoanna uju sinok dope ianakhonna modom jala mulak sian parkarejoanna i dung modom angka ianakhonna i. Alani, tung so adong be tingkinasida marsaor dohot ianakhonnasida.

Di keluarga na asing, parsaoran dohot ruas ni keluarga i mansai gale ala ganup nasida ronsot di ulaonna be. Ianakhon sibuk marvideogame manang marmediasosial (isara ni facebook dohot WA). Natoras pe suang songon i ma tong.

Meja parmanganan paradehon inganan marsaor tu angka ruas ni keluarga (natoras-natoras, natoras-ianakhon, ianakhon-ianakhon). Dison, natoras mansai ringkot jala une ma manungkun ianakhonna “Boha do singkolanasida sadari on?”, rupani. Manang, ianakhon boi do paingothon natoras asa unang lupa ibana mangoru ganjang ni mise manang manang janggutna naung ubanon i. Manang muse, siboru denggan do paingothon inongna asa diorom na mangan i mangingot lambiakna naung mulai marhapal i. Inongna pe denggan do patangkashon anakna, ise do halletna nuaeng. Mansai godang parsiajaran na tupa sian angka panghataion i, isara ni habontoron, haungkapon, habaranion, dohot tanggung jawab.

Nuaeng on, rap marsipanganon dohot ruas ni keluarga lam dirajumi ringkotna. Meja parmanganan gabe inganan na mansai ampit (tepat dan efektif) tu inganan marsaor jala marsirarion ni ruas ni keluarga i. Mansai godang parsiajaran na boi putihan disi.

John Coveney, marhite bukuna na margoar Food, Moral, and Meaning (2000), manigati jala manulingkit rimpunan ni pigapiga penelitian domu tu hinaringkot ni na rap marsipanganon. Di sada bindu ni bukuna i, An Eth­no­graphy of Family Food, Coveney paadarhon angka pandapot ni deba rayat ni Bangso Amerika dohot Bangso Austaralia taringot tu meja parmanganan songon inganan parsiajaran karakter ni ruas ni keluarga, lumobi ma ianakhon. Deba sian parsiajaran karakter na boi jumpang disi, ima mardemokrasi, dos ni roha (ker­jasama), tang­gung jawab, haungkapon (keterbukaan), habontoron, habaranion mangultophon pandapot, kedisi­p­linan, empati, simpati, hapardulion, roha sidok mauliate, haugamoon, dohot hahisaron ni pamatang (kesehatan).

Alani ma, molo najolo natuatuanta mandok “Ndang jadi manghatahatai uju marsipanganon”, nuaeng asing nama. Nuaeng dohononta ma “Beta rap mangan, asa marnonang hita disi!” Mangan huhut marnonang ma!

Penulis: Albiner Siagian (Sahalak parhalado di HKBP Perumnas Simalingkar; Guru Etos dohot Revolusi Mental na marbisoloit)

Leave a Reply

Leave a Reply

Your email address will not be published. Required fields are marked *