ANDAIKAN KAU DATANG KEMBALI

NDANG MARPANGGORTAP

Sarito na Marimpola di Minggu Adven (Tinongos Muse)

BatakIndonesia.com — Ra, sude do hita hea umbege ende na niendehon ni Koes Plus on: Andaikan Kau Datang Kembali. Mangihuthon angka barita na jinaha, uju di ngoluna, disungkun na manungkun ma Amanta Toni Kuswowo, na manggurithon jala na mangendehon ende i, aha do unok dohot tona ni endenasida i. Alusna: Haroro ni Tuhan na paduahalihon.* Bo pe didok deba nadila parende, ianggo pangongkuan on hinaporseaan do.

Dohot roha na elek, sinali ma jo goar ni endenasida i gabe goar ni sarito on di Minggu Advent na patoluhon on.

Mangihuthon haporseaon ni halak Karisten, unok ni Minggu Advent ima na paingothon halak Karisten di haroro ni Tuhan Jesus na paduahalihon. Disi masa paruhuman. Jahahononna ma di Buku Bolon Paruhuman i, ise na bongot tu Harajaon ni Debata manang ise dabuhononNa tu api na rokko na so ra mittop i. Mangihuthon hatorangan di Buku na Badia i, ndang boi be marmanjo, ndang boi be mangido asiasi (dispensasi), ndang masa na marKKN na mandok: “ruas ni Bangso Israel, bangso na tarpillit i, do ahu.” Ndang bolas be marsidalian na mandok: “Tuhan, paima jolo hupatota sidabudabuanku uju mamestahon Ari HatutubuMi.” Sandok, tu siamunNa manang tu hambirangNa, i nama hapeahanta.

Huhilala, ndang masa be wawancara disi, holan na manjahahon angka goar dohot uhuman i nama. Alani ma, molo tung pe didok Amanta Toni Kuswowo aha ma alusna molo ro Tuhan i paduahalihon, angka bungabunga ni ende ma i, ai nunga singkop diboto Tuhan i siala dohot alusta. Alai, etak tung beha sihol roha ni Tuhan i manungkun hita, aha ma tutu alusta?

Tasurasura ma jolo aha sungkunsungkun ni Tuhan i. Domu tu na marminggu-advent, ra on ma sungkunsungkunNa: “Boasa marpesta-natal ho di Minggu Advent?” Alusta: “Ai aha salani Tuhan? Huhutni, nunga huhasomalhon hami i. Ai molo dung Ari Pesta i hami marnatal, ndang boi be sude Pesta Natal i dohotan. Tangkas diboto Hamu** saik godang pesta Natal na nidohotan, hape di bulan Januarina mansai ronsot tingki marsuan. Parsingkola pe masuk ma di bulan i. Alani, nisangahon ma andorang so Ari Pesta i.

“Ba tutu, toho ma alusmi! Dungkkonni, ai boasa pola ingkon di hotel hamu marnatal?” dipatangkas Tuhan i muse. Taalusi ma: “Ai boha ma bahenon, sude gareja nunga marisi ganup ari sian tanggal 1 sahat tu tanggal 31 Desember i. Huhutni, ringkot do hohom na marnatal i. Ai molo di gareja olo do busisaon jolma ala ni mohopna. Molo di hotel antong lambok ma alani AC i. Musengani, dia so dia do arga ni na marnatal di hotel manang dohot di gareja. Molo di hotel, durungdurung na tarpapungu i nunga tuk manggarar sewa ni hotel i, hape molo di gareja, di gareja i do i tading. Jala, molo di hotel, ndang pola pingkiran be na paiashon dung sidung na marnatal i. Molo di gareja, ingkon sarihononhon do uang kebersihan, uang listerik (molo marAC dohot marsoundsystem). Sadanari, molo di gareja, ndang diloas maraccara bebas, isara ni na marpoccopocco, namarmaumere, na marborutoba, na marjamila, dohot na marduaholong. Eh, sadanari hape, molo di gareja hurang do sumanna molo marpahean na arga, lumobi ma molo mardekadeka, mago didok halak iba siginjang roha.”

“Olo tutu bah, na serep ma tutu roham!”, ninna Ibana ma rupani.

Sungkunsungkun na parpudi ma: “Ai sahat do tu Ahu alualu ni dakdanak pangidoido na di topi dalan i na nilanggushonmi. Boha do saritoni? “Ai boha ma! Marpamuati ma rohaM. Humarojor ahu mangadu tu pesta natal i na alani ndang huanturehon be i. Laos mardomu ma tok ulungku, ai sahat tu mata ni Ari Pesta i ndang tota dope parhepengon sian seksi dana. Ise na so busisaon di rohaM molo songon i situasina?”, alusta mangampini dirinta.

“I do ate! Hupingkiri Hami pe i!”, ninna Tuhanta ma huhut manjouhon goar na mangihut, ra. I pe, ra do da!

Selamat Advent III!

*)Jinaha di barita ni sahalak dongan na ditongos tu sitalpas halinu on

**)Di tangiang ni Ompungborungku, sai huingot do didok ‘Hamu’ tu Tuhan i, ndang Ho. Ninna, ndang pulut rohana mandok Ho tu Tuhan i

Penulis: Albiner Siagian (Sahalak parhalado di HKBP Perumnas Simalingkar; Guru Etos dohot Revolusi Mental na marbisoloit)

BACA:  Keterpaduan Dalam Pemulihan Ekonomi

Facebook Comments

Default Comments

Leave a Reply

Your email address will not be published. Required fields are marked *