ARI SOGOT NI TOMBAK NI BONAPASOGIT
Panusunan Simanjuntak
huida nasida
angka na poso angka na malo
pasada gogo pasada tahi
mamangkur tano manabur boni
manuan same ni hau di ingananna be laho tubu
huida di bonapasogit
godang rura dohot buhit
na tubuan hau pardangka na bahat parbulung na lomak
inganan na sio di angka na tinompa
na metmet nang na balga
hau na gok bulung
na marparbue na godang
mangalinggomi portibi sian mohop ni mataniari
manginsop karbon
pademakhon dobar ni udan
pahothon rahisrahis ni robean
padengganhon partubu ni suansuanan
na uli ma antong di simalolong
binanga partapian na tio
na mamolus disaongi angka hau na bolon
na gabe inganan mian na denggan
di marragam ihan
na tabo ma antong di sipareon
soara ni sabur ni aek na tompas di sampuran
bagak di pamerengan
aek i na marpilsikan
lambok ma antong roha ni angka pangisina
marnida soada tano na harsang di luatna
na bisuk ma tutu sada bangso
na mangaradoti tombakna
na mangaradoti mual ni hangoluon
di angka pinomparna
London, UK
14 Maret 2014 – 22
Baca Juga:
