ATTURMANGAN

NDANG MARPANGGORTAP

Sarito na Marimpola di Minggu Adven (Tinongos Muse)

BatakIndonesia.com — Sada sian rumang ni las ni roha na dung hea huparsaulihon ima uju na patupa gabagaba di gareja. Sasintongna, ndang dohot iba na patupa gabagaba i, amongku do.

Na ujui, andorang disihadakdanahonniba, mangihuthon hasomalan di hurianami, di tanggal 24 Desember ma pajonjong gabagaba. Gabagaba i dipauli sian bulung ni atturmangan (ndang tursam). Di tanggal 22 Desember nunga borhat pigapiga halak sintua mangalap bulung ni atturmangan i tu harangan na marasam lobi 4 batu sian garejanami. Dihallung nasida ma dakka ni anturmangan i sagodang ni haporluan tu gabagaba i. Sipata ma i didolos manang disaratsarat.

Bona ni pisang ma anggo tiang hajongjongan ni gabagaba i. Diparrusukhon ma dakka ni anturmangan na mardongan bulungna i tu bona ni pisang i, dung jolo dirantosi. Lam tu ginjang lam jempek dakkana i asa manguman gabagaba (pinsur tu ginjang). Di parginjang sahali, ditusukhon ma silang sian bulu tu unok ni bona ni pisang i. Laos di silang i ma dipatupa tolu inganan ni lilin. Di holangholang ni angka dakka ni anturmangan i dipantusukhon ma tong bulu angka inganan ni lilin. Harotas miak na massam keleurna ma anggo rendarenda ni gabagaba i. Olat ni i do! Nunga jadi be gabagaba i.

Di ginjang ni pintu dohot gareja dipatupa ma maremare na sian bulung ni bagot na poso (na so mangerbang i dope). Sian jolo sahat tu pudi dipagistang ma karotas miak na marpiupiu. Sai meoreor ma i tu jolo-tu pudi diullus alogo i. Bagak ma antong idaon.

I ma jo taringot tu gabagaba i. Na naeng huondolhon di sarito on ima las ni rohangku na hudok di ginjang i. Sai huellem do tu amongku asa dohot iba tu gareja di na pauli gabagaba i nasida. Saotikna, adong dua alasan boasa sai mangihut iba. Na parjolo, dapotan ma iba di tebateba ni bulung ni atturmangan dohot lobilobi ni karotas miak i. Alani, boi ma pinatupa gabagaba na metmet di jabu. Songon i ma tong rendarenda na sian karotas miak i. Boi do i sukkup pinatupatupa marhite na mamola harotas miak i. Na paduahon, tontu, dohot ma iba mangan disi.

Somalna, molo pauli gabagaba sai maneat do nasida. Sai pinauladohot ma manutungi pinahan i manang manggorgori apina. Sabas ma antong na mangan i, lumobi ala naung tarpapungu bulung ni anturmangan i.

Tep ma i, mulak ma sian gareja. Manigor nilojong ma tu porlak manaba bona ni pisang na menek. Binola ma bulu bahen inganan ni lilin. Indahan ma anggo na gabe lem ni harotas miak i. Nihudus ma mangkarejohon i ala ingkon mararipesta natal jala marsipajojoron ma bodarina. Nunga tarbayang buku tulis si sampulu dua lembar dohot pitolot hadiah ni na marsipajojoron i.

Boha lilinna? On ma sada parsoalan. Ai tung maol do dioran lilin uju i. Molo tung adong pe, ndang sai adong hepeng manuhor i. Alai adong do jalan keluarna. Dung sidung na mararipesta i, marsigulut ma iba dohot angka dongan mambuat lobilobi ni lilin na di gabagaba i. Pinongggol ma i sipata asa lolo pangkeon tu gabagaba na di jabu i. I ma pinaasiasi marhite na pangoluhon lilin i sasatongkin ganup bodari sahat tu taon baru.

Sun las ni roha tingki i. Ndang tarpatudos i tu suasana ari pesta natal sinuaeng.

Anggo nuaeng, hira so adong be gabagaba na sian atturmangan manang tursam, sian palastik nama. Dekadeka do i! Lilin pe sian listerik nama. Hape sai tadok pagalak lilin, hape pagalak lampu listerik manang mancis nama.

Ra, porlu do hita mulak tu sinaujui di na patupahon hiasan natal: gabagaba dohot maremare. Laos ampit do maremare i (palma/palmarum) di Minggu Advent on, songon na masa di panomu ni si Sakkeus diharoro ni Tuhan Jesus ujui. Tamba ni i muse, mangorui angka palastik marlapatan do i mamparhamaol jadijadianNa (bumi)!

Selamat Mangarade tu Adven III!

Penulis: Albiner Siagian (Sahalak parhalado di HKBP Perumnas Simalingkar; Guru Etos dohot Revolusi Mental na marbisoloit)

BACA:  Anugerah Pagari Batak

Facebook Comments

Default Comments

Leave a Reply

Your email address will not be published. Required fields are marked *