BARITA SIAN TANO PONGGOL
Panusunan Simanjuntak
on ma barita i:
jambatan na imbaru dipature
nunga singkop, nunga rade
na digoari Jambatan Tano Ponggol
na padomuhon pulo Sumatera dohot pulo Samosir
na niholangholangan ni tapian ni Tao Toba
na digoari Aek Tano Ponggol
marjonok tu 300 meter ma ganjang ni jambatan i
alai mar 100 meter ma ianggo apala na tipak di ginjang
ni aek ni tao i
na bagak, na jeges do antong jambatan i
jagar, jengkar, tudos tu sude jambatan di portibion
na dipajongjong mangihuthon tu hamajuon ni partungkangon satingki on
togos, satogos ni angka bosi na gabe pangarahut dohot tiang ni jambatan i
andorang so jambatan dipajongjong
diparenta pamarenta do sude inganan na humaliang
dipatogu topitopi ni Aek Tano Ponggol i saganjang ni lobi sian sakilometer
dipabolak bidangna gabe 80 meter
jala dihurak, dipabagas sahat tu 8 meter
na manghinorhon kapal ro di nasaborat ni 2000 DWT bolas mamolus
ninna sejarah
najolo mardomu do Pulo Sumatera dohot aha na gabe Pulo Samosir sisaonnari
alai, di ari 17 Maret 1906
dipungka Bolanda ma mamangkur tano hadomuon i
mamonggolsa, na mambahen Samosir gabe sada pulo di tongatonga ni Tao Toba
lapatanna
topet di ari sadari on
ari 17 Maret taon 2023 on
marumur 117 taon ma Aek Tano Ponggol on
marhite karejo rodi do nasida
na disuru Bolanda mamonggol tano domudomu i sahat tu taon 1913
Aek Tano Ponggol Wilhelmina do sipata didok goarna
tudos tu goar ni ratu ni Bolanda hatiha i
Jambatan Tano Ponggol
jambatan domudomu
anggiat ma i gabe dalan
laho mangareahi angka na ummuli, na dumenggan
di tao i, di pulo i, di na humaliangna
dohot di saluhut pangisina
Camberley, UK
17032023
About Author
