BETA MARIAIA, SAONARI! (Tinongos Muse)

Pemimpin Itu adalah Motivator

Angka dongan na hinaholongan. Didok angka na pistar, pardalanan ni ngolunta on tudosdo tu sorha ni padati, sipata di ginjang, sipata di toru. Songon ima marsoringsoring, sian ari, bulan, tu taon. I marlapatan ingkon tagam do hita di arsak dohot las ni roha, haponjoton dohot halumbangon, dohot uas dohot sombu ni roha. Sude do hita manghilala i. Na asing ima dokdok manang neangna jala boha hita mangadopisa.

Na gabe sungkunsungkun, saonari, ima “Boi do daging dohot tondinta mariaia alani? Manang, gabe mandetu do hita dihorhon i?”

Aristoteles, sada pandebisuk sian Gorik na mansai tarbarita, mandok: “Tujuan ni parngoluon ni manisia ima na mariaia manang na marlasniroha (kebahagiaan). Mangihuthon pangantusion on, manisia manangkothon las ni roha i di ginjang laho dungdungon jala mameakhon di jolo laho aduon. Alai, nuaeng on, ingkon tauba ma pangalapation na songon i. Las ni roha ndang pola dungdungon jala aduon. Rade do ibana, di inganantabe, saonari. Intehon hamu ma!

Domu tu na rade do las ni roha i saonari, dison, adong do sarito na hea jinaha na manggombarhon i. Di na sahali, di topi tao, marnonang ma sahalak pardalandalan (turis) dohot parbubu. Disungkun pardalandalan i ma parbubu i: “Ndang adong tahim marsali hepeng tu bang?”

“Tu aha i?”, ninna parbubui mangalusi huhut dipaune bubuna i.

“Ba, asa boi tuhoronmu parao laho manjala ihan”, ninna pardalandalan i.

“Oo.. i do, ate! Tu aha ma ingkon porlu parao?”, ninna parbubui manangkasi.

“Molo nunga adong antong paraom, bahatma dapotmu ihan”, ninna pardalandalan i patoranghon.

“Toho ma tutu! Bahat ma dapot ihan. Alai, tu aha ma ihan na bahat i?”, ninna parbubui huhut di taon bubuna tu topi ni tao i.

“Gadisonmu ma ihan i. Godang ma hepengmu jala boi ma ho marsipanganon na tabo, manuhor angka pahean na uli, pauli bagas na martangga batu, jala mardalandalan songon ahu. Las ma roham!”, ninna pardalandalan i ‘manjamitai’ parbubu i.

“Ooo.. Anggo i do hape, nunga madaohu jala malelenghu i. Molo las ni roha do nimmu, nunga huparsaulihon i di inganan on, saonari!”, ninna huhut dihonong ibana tu tao i laho manigat bubu naung ditaonna nantoarina i. Hohom ma amanta pardalandalan i umbegesa alus ni parbubu i.

Ndang na mandok ndang ringkot mandai sipanganon na tabo, marpahean na uli, marbagas na martangga batu, mardalandalan mamereng hinauli ni portibi on, alai molo ingkon paimaonta do i tupa asa marlasniroha hita, harugian bolon do i. Tudos do i tu parbubu i, ndang ingkon paimaonna bahat hepengna asa marlasniroha daging dohot tondina. Las ni roha i nunga diparsaulihon ibana, tingki i, di topi tao i.

Ai so adong ihotihot molo dung bahat hepeng, molo dung uli pahean, molo dung uli bagas, molo dung timbo sikola, molo dung sangap jabatan, molo dung marmotor na sumalin argana, jala molo dung mardalandalan tu sude liat portibi on dapot hita ma las ni roha i manang mariaia tondinta. Nunga bangko ni hajolmaon molo dung bahat sinadongan naeng ma tamba bahat, molo dung uli bagas naeng ma tamba uli, molo dung timbo singkola naeng ma lobi timbo, jala molo dung sangap jabatan naeng ma lam sangap. Ndang adong na singkop! Ndang marnasombu tagas!

Alani, las ni roha ndang ra tarpareak. Toho ma tutu pandohan na bisuk na mandok “Boi do jolma i manuhor tilam na mansai lampot podoman, alai ndang modom na sinok.” “Mura do deba jolma i pauli bagas na tung uli, alai ndang keluarga na mariaia.”

Mariaia ma saonari!

Ai tung toho do maol pareahon las ni roha i?
Manigor hualusi ma jalo: “Daong”!
Alai, boasa torop jolma marhoihoi manjalahi las ni roha i?

Alusna: Jolma i mameakhon las ni roha i mansai timbo dungdungon jala mansai dao aduon.

Ingkon jolo uli bagas, ingkon jolo sangap jabatan, ingkon jolo tamat sude ianakhon singkola, ingkon jolo sohot sude, ingkon jolo marpahompu, ingkon jolo sarimatua, ingkon jolo saurmatua, manang ingkon jolo maulibulung asa marlasniroha jala mariaia tondinta, marlapatan ma i tasangkothon las ni roha i mansai timbo dungdungon jala tapeakhon mansai dao di jolo pareahon.

Boasa ndang tahamauliatehon bagas na tasewa na so hea dibaor aek i, manang jabatanta na menek na alani i ndang hea hita dipajoujou KPK? Las ni roha marharoroan sian boha ma hita mangalapati jala manghamauliatehon pasupasu na tajalo sian Tuhan i.

Na mangihut siala maolna mangeahi las ni roha ima jotjot hita patudostudos dirinta tu angka dongan na asing, isara ni tu hombar bagas manang tu angka dongan di parkarejoan. Silakkona, jotjotan do hita patudos dirinta tu halak na tumimbo hadirionna. Alani, tubu ma pangiburuon. Unangunang so elat dohot late na tubu. Mamereng hombar bagas markareta na imbaru, manigor busisaon hita tu karetanta naung buruk i. Umbege dongan mardalani tu Bali manang tu Jerusalem, mambahen pardalananta tu Simarjarunjung na ngali adui gabe hodohan. Boasa ndang tahamauliatehon kareta naung buruk i, na so hea manggulang hita tu bondarbondar i? Boasa ndang taparsaulihon pardalananta tu Simarjarunjung na maroban sude tondong marmotor palakka so pola hansit gonting ala ndang pola marsali laho haporluan tusi? Sahali nari, patudostudos hita tu angka dongan, holan pagangganghon hita do i sian las ni roha i.

Na mangihut muse na gabe pangambati las ni roha ima na sai tahilala songon halak ma hita uju manghilala las ni roha i. Asa hantus pangantusionta taringot tuson, tapaihutihut ma tudosan on.

Adong ma sada keluarga na mora mambagabagahon tu anakna sada motor na ummuli molo denggan punten ni anakna i di raporna (andorang so i, nunga adong hian motor ni anakna i). Di inganan na asing, sada keluarga na pogos mambagabagahon manuhor kareta angin tu anakna molo denggan puntenna. Sungkunsungkun: Ndung tupa sude bagabaga i, ise ma sian ianakhon na dua i na lobi las rohana?

Hudok ma tu hamu, dos do gok ni las ni rohanasida. Anak ni na pogos i, ndang tung hea di pingkiranna naeng marmotor, lumobi motor na uli. Holan kareta angin do diparsinta rohana. Molo dung tupa i, marlasniroha ma ibana. Aut sugari ma na mora i holan manuhor motor na hira sarupa tu motor ni anakna sinuaeng (na tung andul argana sian arga ni kareta angin ni anak ni na pogos i), tontu marsak do anakna i.

Na parpudi, siambati hita marlasniroha ima bakkolta mandok mauliate. Las ni roha marpardomuan do i dohot boha ma hita mangalapati positip hadirionta dohot na taparsaulihon: manjangkonsa dohot manghamauliatehonsa, so pola manarita, marungutungut, lumobi ma mangibiru. Molo sai sian suhi na negatip hita mamereng manang nangalapati na masa, talpe ma hita tu pangalapation na so manghorhon las ni roha. On ma na nidok ni parpsikologi positif na pahembangkon suhi na positip di hadirion ni jolma.

Di galas na marisi aek satonga, rupani, boha do hita mangalapati i? Galas kosong satonga do manang galas marisi satonga (satonga gok)? Songon i ma tong jabatan dohot ulaonta. Hudok ma jolo, molo tungpe, nuaeng jabatanta menek, lapatanta do i alani hahuranganta gabe so boi nangkok tu jabatan na tumimbo, manang haporseaon na dipasahat tu hita na ingkon sihamauliatehononta?

Angka dongan, na girgir mandok mauliate, i do na marlas ni roha na tutu. Alani, ndang pola paimaonta mamora, marsangap, gabe, sarimatua, saurmatua, manang maulibulung asa las rohanta. Sidok mauliate ma, dung i mariaiama hita! Saonari!

Penulis: Albiner Siagian (Sahalak parhalado di HKBP Perumnas Simalingkar; Guru Etos dohot Revolusi Mental na marbisoloit)

BACA:  Yang Amat Terpelajar

Facebook Comments

Default Comments

Leave a Reply

Your email address will not be published. Required fields are marked *