MARLERENG DI DOLOKDOLOK
Panusunan Simanjuntak
di manogot ni ari on hohar pahompu dohot anaha
paharuar lereng sian ingananna
laho pangkeon nasida
marmeam di dolokdolok ni huta
bage marsipatu
mamangke tahuluk na togos
laho mangondingi simanjujung
molo lereng matompas
adong do tong parhohas na dirahut gomos
laho pasidingkon dugul sian na magosgos
marlereng di dolokdolok?
ambalnai, ningku tu diringku
di tingki sihadakdanahonku
ulaon na somal do di ahu
raphon angka dongan simagodang
laho tu dolokdolok ni huta mambuat soban
ndang marsipatu
ndang martahuluk
ndang marpangondingi ni dugul
holan rabi do parhohas nami
laho manallik soban
ndang sitaba hau hami
holan dangka ni hau do
na boi buaton nami
gabe soban
di tarombara ni jabu ma soban i niturpuk
laho parhaseangon sasaotik
tingki so masa ni ulaon di hauma
do hami marsoban
na mambahen ndang lola mulaulaon
sian na mamangkur sahat tu na gotilon
siala ni na marsoban
ambalnai, ningku tu diringku
tingki sadari on pahompu dohot anaha
marlereng di dolokdolok ni huta
‘mountain bike’ ma didok nasida goarna
Camberley, UK
02042023
Baca Juga:
