Molo Litok Aek di Jae, Tingkiron ma tu Julu

JAKARTA, BatakIndonesia.com — Nuaeng on tung sar do barita sangkap ni Amanta Gubernur Provinsi Sumatera Utara na giot pasadihon Festival Danau Toba (FDT) naung marpigapiga taon dipatupa ganup taon. Mansai marragam pandapot ni natorop domu tu pandohan (pernyataan) i. Adong na satolop alai hira godangan do na so satolop. Gariada adong deba na manihai.

Nian, ganup ulaon na dipatupa pamarenta, dohot ma FDT i, ingkon ma marlaba hombar tu na tinuju ni ulaon i. Lapatanna, ingkon sahat ma tu tujuan naung ditotophon, bo pe ndang sai ingkon sude. Tambani, ingkon tarida ma panghorhon ni ulaon i. Domu tu FDT i, ingkon adong ma panghorhonni tu na lam tarbarita luat i tu liat portibi on, na alani lam torop jolma paniondur mangebati Tao Toba dohot na humaliangna. Asingni, lam tubu ma ngolungolu ni angka pangisi ni luat i.

Mangihuthon gubernur, sialana umbahen na dipasohot FDT i ima ndang marlaba pesta bolon i lao pahehehon pariwisata di na humaliang Tao Toba, ninna. Mangahinthon pangantusionniba, mansai ringkot do adong usaho laho pahebahebahon sada inganan na naeng panionduran, isara ni alam.(natur) dohot budaya (kultur), asa sar baritana, na alani marroan ma jolma tusi. FDT, rupani, ima sada usaho laho pahebahebahon haulion dohot hasurungan ni natur dohot kultur ni Tao Toba dohot na humaliangna. Alani, molo tadok ndang marlaba i, tontu sungkunsungkun domu tusi ima boha do huroha FDT i diulahon na sakeleng on? Nunga tongkos i disangkapi dohot denggan jala singkop? Nunga diririt tingki na sirsir jala une di na mangulahon i. Nunga dipangido panuturion siang angka raja dohot loloan na torop na umbotosa hamoraon ni natur dohot kultur ni luat i, manang holan marbagahon hillo (kaca mata) ni pamarenta do? Pamarenta ingkon do mangarajumi dirina ndang siboto saluhut. Alani, mansai ringkot ma pangidoonna hata panuturion panaurion sian situan na torop. Mansai denggan ma dipadohot nasida tu ulaon bolon i.

Na mangihut, na so hurang ringkotna, ima “Nunga tingkos ditodo halak na patut jala umbuk mangulahonsa?” Ra, molo alusna ‘nunga’ tu sude sungkunsungkun i, une ma dipasadi. Alai, molo ‘ndang dope’ do, dipadasip ma pangaradeon dohot panghobasionna tu joloan on. Ndang tolbahon manang soksongon binanga molo tung gutor manang litok aekna i di jae. Tingkiron do tu julu, etak tung adong na mangalitohi disi. Na mangalitohi i do sipinsangon, molo ringkot sidoltuhon.

Anahon ma!

Penulis: Albiner Siagian (Sahalak parhalado di HKBP Perumnas Simalingkar; Guru Etos dohot Revolusi Mental na marbisoloit)

BACA:  Kemanusiaan (Humanity)

Facebook Comments

Default Comments

Leave a Reply

Your email address will not be published. Required fields are marked *