NA PINADAR

Pemimpin Itu adalah Motivator

JAKARTA, BatakIndonesia.com — Napinadar. Mansai tarbarita hata on nuaeng. Marbingkas ma i sian barita ni arga ni lompalompaan na tung andul sian lompalompaan na sahorong di sada lapo parmanganan dingkan Simpang Tolu, Dairi, adui. Ala sar ni barita i, pola dipio parlapo i tu telepisi lao patumpolhon tu natorop domu tu arga ni lompalompaanna i. Sae ma i. Na ringkot saonari, taputihi ma angka parsiajaran na arga domu tu na masa i. Sada sian i, ima lam dasip ni panghobasion (pelayanan) ni angka partigatiga tu joloan on.

Napinadar (sasintongna: na pinadar) marharoroan sian hata ‘padar’. Dung diambai panjoloani ‘di’ tu hata padar i gabe ‘dipadar’ ma (hata horja pasip). Hombar tu rangsa ni panurathonon hata Batak, hata ‘dipadar’ boi do gontion gabe ‘nipadar’ manang ‘pinadar’. Hata pinadar i ma na tumoho jala i ma unsomal dihatahon. Alani, hata ‘na pinadar’ marlapatan ‘yang dipadar’ atau yang diolah atau yang dimasak dengan cara memadar.

Na pinadar ima sada horong lompalompaan (lauk) tradisional di halak Batak. Somalna, manuk ma parjuhutna. Manuk na pinadar ima jagal manuk natinutungan jala ginotaan (daging ayam dibakar lalu dilumuri oleh darahnya). Tusi diambahon ma angka parmasak na paro ijur dohot mandoit pangabas (dila), isara ni lasiak (cabe rawit), pege, hasihor, dohot andaliman. Sandok ingkon hohar ma hodok dung sidung mamanganhonsa. Alani do umbahen na somal disintak sasahalak kameja manang kaus kutangna pahurehure butuhana na marlambiak i dung sidung manganhon na pinadar.

Dang holan i, sipata, ingkon manetek ilu ala ni siakna. Jala, on ma hasurunganna: ingkon mangampir pangabas. Ra, ala ni ma umbahen didok goarna padar (ra, sian hata pedar). Pedar marlapatan rasa getir di lidah.

Domu tu dila na mangampir i, sai dipangido halak ma aek ngali inumonna dung sidung manganhon manuk na pinadar. Hape, sasintongna, lehe do i. Ingkon aek na las-golom do inumon asa mombut siak ni lompan dohot pangampir ni dila i. Ingkon na mohop do alo ni na siak.

I ma jo tusi, taringot tu pandoit ni manuk na pinadar i. Alai, huhutni, ra, patut do mandoit argana i, ate! “Ada arga, ada doit!” On ma mottona. Ingkon manginsombut pandoitna i sahat tu na lopus pandoit ni argana i.

Tombus! I ma hata na ampit domu tu panghilalaan dung sidung mangallang na piadar i. Ndang piga lompalompaan ni halak Batak na marrumangkon na songon i. Ala ni tombusna, molo mamolus inangbaonta sian jolonta, buriapus, datung berengonta i.

Mulak ma hita tu parsiajaran na une putihonta domu tu barita ni manuk na pinadar i. Sian suhi ni Ilmu Marketing, ndang pola be gararonta biaya iklan laho pahebaheba manuk na pinadar i, nunga tarbarita-boti ibana ala na masa i. Saonari, sipingkiranta ima boha ma asa manuk na pinadar i sahat tolhas tu meja parmagananta i.

Porsea do ahu, bope i sada sian massam ni lompalompaan ni halak Batak, gumodang dope halak Batak na so hea mandaisa sian naung hea, lumobi ma bangso na asing. Alani, tapangke ma momentum on laho manghinsat halobian ni manuk na pinadar i. Hita halak Batak ma na pahehehonsa. Tatuhor ma, tapangan ma! Tambani, tapaias ma laponta. Tapasuman ma engkel supingta tu angka tobonta. Unang ma sai holan kaus kutang naung marhunik i tapangke. Argana i pe tapahombar ma.

Molo songon i do, berengkon hamu, ianggo so tombus dai na. Tombus ma tagasta ala pandoit ni manuk na pinadar i.

Penulis: Albiner Siagian (Sahalak parhalado di HKBP Perumnas Simalingkar; Guru Etos dohot Revolusi Mental na marbisoloit)

BACA:  Sains Itu Bebas Politik

Facebook Comments

Default Comments

Leave a Reply

Your email address will not be published. Required fields are marked *