Natal dohot Pardengganan

Natal dohot Pardengganan

Sarito na Marimpola di Minggu Adven (Tinongos Muse)

JAKARTA, BatakIndonesia.com

Hark the herald angel’s sing
Glory to the new-born King
Peace on earth and mercy mild
God and sinners reconciled

On ma ayat 1 ni ende koornami uju marnatal hami najolo angka parsingkola SMP. Laos dihatabatakhon enciknami, guru Bahasa Inggeris, ma ende i, boti:

Bege ende ni suruan
Sangap ma di Tuhan i
Dame ma di tano on
Jolma halomoan i

Ndang apala huboto, dia ma dalanna ‘God and sinners reconciled‘ i dihatabatakhon nasida gabe ‘Jolma halomoan i’. Nian, mansai toho do Jesus Kristus na ditubuhon i, Jolma Halomoan, alai ndang apala i na nidok ni ende i.

Hata reconciliation (sian hata reconcile) dihataindonesiahon-boti gabe rekonsiliasi. Rekonsiliasi marlapatan perbuatan memulihkan hubungan persahabatan pada keadaan semula; perbuatan menyelesaikan perbedaan (KBBI edisi online).

Di hata Batak, adong do hata na ampit lapataanna dohot hata reconciliation i, ima ‘pardengganan’. Pardengganan ima hata ugasan (kata benda) tu ulaon mangareahi hadengganon manang mardenggan, topetna mardenggandenggan.

Molo marsanding iba dohot dongan saparmeaman disihadakdanahonniba, ndang marsipangkulingan be. Molo mulak inongna sian onan mamboan rondang manang gambang, ndang dohot be iba taruli. “Unang talehon tusi, sandingta do i!” On ma hata na somal ruar molo masa na songon i.

Sai niellem ma i, na mandok: “Tingki adong rondangku manang mouthu namasahai hulehon do tuho!” I jo! Saotik pe!”

“Ah… Ndang olo ahu! Sandingku do ho!”, ninna ma mangalusi huhut disuguthon rondangna i tu balik ni abitna di butuhana i. Tung so lehononna do i andorang so marujung parsandingon i. Ingkon jolo mardenggan do.

Hatutubu ni Jesus Kristus ima dalan pardengganan ni manisia dohot Debata. Jala, inisiatif ni Debata do i. Tontu sahali, manisia na olo mardenggan dohot Ibana do na dapotan pardengganan i. Alani, tajangkon ma pardengganan na binoan ni Tuhanta Jesus i tu hita. Unang sogot didok: “Ah…, ndang parsidohot ho! Sandingku do ho!

Selamat Natal!

Penulis: Albiner Siagian (Sahalak parhalado di HKBP Perumnas Simalingkar; Guru Etos dohot Revolusi Mental na marbisoloit)

BACA:  Kunci Sukses: Terus Bekerja dan Pantang Menyerah

Facebook Comments

Default Comments

Leave a Reply

Your email address will not be published. Required fields are marked *