NDANG MARPANGGORTAP

NDANG MARPANGGORTAP

Sarito na Marimpola di Minggu Adven (Tinongos Muse)

BatakIndonesia.com ─ Hatiha i, naeng pamasaon ni Kesar Agustus ma sensus di sandok luat na ginonggomanna laho mangetong bahat ni jolma ginonggomanna i. Mansai asing do marsensus tingki i sian sinuaeng. Molo di tingki i, sude angka pangaranto diparenthon asa mulak tu bona ni pinasana be. Disi ma nasida dietong. Ianggo nuaeng petugas sensus i do na ro tu ganup jabu.

Ala pangaranto do si Josep, bo pe ndang pola holang sian bona pasogitna, dohot ma ibana dohot oroanna, Si Maria naung gabegabean i, mulak tu bona pasogitna, sian Nasaret nangkok tu Luat Judea na margoar Betlehem.

Ndang apala tangkas dipaboa sadia leleng ma nasida na mangeahi bona ni pinasana i. Alai, na boi dohonon, tung marhoihoi do nasida, lumobi ala naung denggan pamatang ni Si Maria i.

Huroha, ndang adong be dongan tubu manang sisolhot ni Si Josep di Betlehem. Dung sahat nasida di huta i, diordior ma nasida bahen inganan parmianannasida. Dituktuhi ma pigapiga jabu. Sude mandok nunga pol. On ma ra sada sitindangi tu hata na mandok: Diporso jala ditulak portibi on do Ibana.

Ala hira so adong bagas na manjangkon nasida, lobu ni pinahan ma diparar nasida bahen parmiananna. Panggagatan ni pinahan ma lagena. Halang uluna, olo ma angka na adong di dipatupatupa. Tingki i nunga mandonok bagas borngin. Angka pangaranto na mulak dohot parhuta i pe nunga sinok be modom. Holan dua halak ma na dungo dope.

Ndang adong umbotosa haroro ni Sipalua i. Ra, Si Josep ndang apala mangantusi i. Bo pe dipeop Si Maria hata ni Surusuruan taringot tu Raja Sitobus Manisia na di bortianna i, ndang apala marhatopot rohana, tong do marhusori. Alani ma, di Ende Advent Nomor 40 ayat 1 i, didok do:

Las be ma rohamuna na tigor roha i
Naung ro do Rajamuna mamboan tua i
Ndang marpanggortap i anggo di haroroNa
Alai tuk do gogoNa padaohon jea i

Ndang marpanggortap lapatanna ndang adong umbotosa, ndang jolo marboaboa. Dung dipaisorangkon pe Jesus asa didok Surusuruan tu angka parmahan asa unang mabiar nasida, ai barita las ni roha do na masa i. Dungkonni, parhapistaran sian Purba ma na umboto na masa i. Laos nasida ma dohot angka parmahan i na mamaritahon hatutubu ni Sipalua i.

Alani, mulak ma hita tu sintuhu ni Minggu Advent i. Ndang na marpesta hita disi, lumobi ma na marsengkosengko. Tarimangi ma jolo di bagas rohanta, dung i taalusi sungkunsungkun on, tong di bagas rohanta. Une do hita marpestapesta hape na ‘tapestahon’ i marungkil dope mandiori inganan hatutubuNa?

Huhutni, tahaporseai do, unok ni Advent ima managam haroroNa na paduahalihon do. Alani, tapahembang ma amakta, tapagalak ma palito dohot sulunta, sadihari ro Ibana tumopot hita, songon na didok di ende no 40 ayat 2 i. Molo ringkot, beta manomu Ibana tu harbangan ni hutanta.

Tibu ma ulahanNa manopot jolma i
Sude hasangaponNa tarida ma disi
Sai borhat ma hamu manomu Rajamuna
Pagalak sulumuna Ibana ro tibu

Selamat Adven II!

Penulis: Albiner Siagian (Sahalak parhalado di HKBP Perumnas Simalingkar; Guru Etos dohot Revolusi Mental na marbisoloit)

BACA:  Menggunakan Fasilitas Kartu Indonesia Sehat

Facebook Comments

Default Comments

Leave a Reply

Your email address will not be published. Required fields are marked *