BatakIndonesia.com — De facto, saonari on, mansai torop do ruas ni bangso on naung detem roha habangsoonna. Holan ditondong nanget manigor harharnama. Tudos ma i tu lage manang amak naung detem baionna.
Molo use hua ni jagal tu lage i sangga dihunduli angka tamue di ulaon paradaton, rupani, jala ndang jalo i dijomur, detem ma baionna i. Holan ditondong i nanget manigor harhar ma baion na detem i. Maribak ma lage i.
Molo ndung maribak lage i, hahuaon ma? Bolokhononhon manang tutungon ma sotung gabe asar ni bagudung di sokkor? Daong! Adong dope dalan paunehon i. Panutan marhite panut.
Panut ima sada parkakas na dipatupa sian bulu marhite na mangartisa lihi. Ganjangna lobi hurang sanjongkal ni naung magodang. Ujungna i rantos asa ura surukhononhon tu baion ni lage, rere, manang amak i. Ihurna i dibola dohot raut na gabe hapithapit ni baion pamanuti i.
Molo dusurukhon panut i tu lage i sian sabola na sada ni lage naung maribak i mangihuthon baruran ni baion ni lage i, ditait ma panut i dung i disurukhon tu lage di na sabola na asing. Alani, mangihut ma baion na hapit di ihur ni panut i. Songon i ma dipaulahulakhon jala disilangkon parsuruk ni panut i. Ujungna, langkop ma lage na maribak manang na mapuntas i. Mardomu ma baion i muse jala une ma lage i.
Domu tu ruas naung detem roha habangsoonna i, ndang boi be jarum padomuhonsa i. Tu na songon on mansai ringkot ma panut. Ndang holan uhuman ni panut, asingni ringkot ma na malo mamanuti.
Sipanutan pe disagi ma. Adong do lage (rere) i naung detem baionna lobi satonga bolak ni lage i. Molo dung songon on, ndang panuton be. Tumagonnama letehon lage na imbaru. Songon i ma tong angka ruas naung mangharhari habangsoonna sasude, ndang ringkot be panutan i. Ambololonghononhonnama i sotung gabe asar ni ngitngit i na alani gabe bali detemna i tu lage (ruas) na denggan roha habangsoonna. Ndang uhuman burukburuk ni rere be i na bolas dope letehon manang panuton, songon nidok ni Amanta Nahum Situmorang di endenasida, Na Hinali Bakkudu i.
Alani, hamu angka partogi ni bangso on, manat jala sagi ma hamu di lage sipauneonmu. Gabe panut ma hamu na malo mamanuti. Molo une dope panutan, panuti hamu ma. Molo ndang une be, auphon hamu ma lage i tu laut na bagas adui. Molo ringkot, marsidokdohi bahen hamu asa unang mumbang be. Songon i do partogi na jogi, todos, jala marsahala.
Penulis: Albiner Siagian (Sahalak parhalado di HKBP Perumnas Simalingkar; Guru Etos dohot Revolusi Mental na marbisoloit)
Baca Juga:
