Serial Kearifan Batak (11): Pengido Ras Tuktuki Ma!

Serial Kearifan Batak (11): Pengido Ras Tuktuki Ma!

JAKARTA, BatakIndonesia.com — Kerna menjalo ngo nasa simengido, kennaan ngo kalak simennulusi janah ibuka ngo pèntu bai kalak simenuktuki–Hata Pakpak (Lukas 11:10).

Tibu manogot ni ari, ditongos sahalak dongan sintua ma ayat on tu WAniba. Nian, di tolu hata (bahasa) i ditongos nasida, ima Hata Indonesia, Hata Batak, dohot Hata Pakpak, alai hupillit ma Hata Pakpak i ala pos do rohangku hira boi do suraonta lapatanni nang pe Hata Pakpak.

Dung hujaha ayat i, hupingkiri ma: “Aha ma tutu unok manang tona ni ayat i?” Manigor huingot ma ende on, na somal niendehon ujui di sihadakdanahonniba:

Pidong ambaroba pidong ni Toba

Nang pidong siruba pidong harangan

Na burju marroha dapotan poda

Na burju mangula na butong mangan

On ma imana: “Na burju mangula na butong mangan!” Ala ndang sai songon burion hunik gogo ni nataulai, tontu ingkon adong ma pangkirimon, topetna pangkirimon na mangolu. Alani, hata ‘mengido’ dohot ‘menuktuki’ na di Lukas 11 ayat 10 i hata ‘pangkirimon na mangolu’ ma hata ihutanna. Domu na paima parbue na taula i, hata na pas manggombarhon i di Hata Inggeris ima optimistic (Indonesia: optimistik).

Optimistic marharoroan sian hata dasor optimism. Molo tasigat tarombona, hata optimism ima gomparan ni hata optimum (Latin). Kamus Merriam Webster mangalapati optimism: a doctrine that this world is the best possible world. Di Kamus na asing–English Language Learners–didok optimism is a feeling or belief that good things will happen in the future manang a feeling or belief that what you hope for will happen. Parulaon na optimism didok ma optimistik. Tuktuhi ma, sai na bungkaonna do!

Nuaeng on, nunga tung godang jolma, dohot ma Halak Batak, na marpangalaho na suhar tu na optimistik i, ima na pesimistik. Panghorhonna ima gale mulaulaon, ujungna gabe losok mulaulaon. Mardomu ma i tu baro ‘instant’ (tompu) i. Manigor ‘kontan’ ma nian laba ni naniulana i, ndang rade marpaima.

Manguhuthon angka pandehirpas tu na mulaulaon (motivator), adong do dua horong bolon sahit (baro ngenge) ni jolma nuaeng on, na palemba nasida mulaulaon. Na parjolo ima pessimistic (pesimistik). Pangalaho na pessimistik mulaulaon ima na sai girgir marsurasura ari rondo, mangkolom ari, ombun marbirong, dohot naeng ro ma rimbus jala ujungna por ma udan. Ala ni i, sundat ma mulaulaon. Ai boha huroha molo diteneng udan? Ai so songon sira hita malala bahenonni. Musengani, hambing do mirput tu udan, jolma ndang. Sahalisahali, ringkot do suraonta halibutongan tanda ni na mullop ma mataniari.

Na paduahon ima na pervasif. Bahat do nuaeng jolma mangkilala sude alona. Agia tung sada ndang adong jolma na mangkalomohon ibana di rohana. Songon i ma nang sabalikna, ndang adong na une di parnidaanna. “Agia tung sada ndang hasea i!” “Tole ma, nunga hutanda sudei! Angka boltoksonom do i apala luhut!” “Tok ulungku nuaeng, ai tung sude do jolma on ndang manangihon hatangku! Hape, diboto hamu do? Holan tolu halak do i sian sampulu halak.” “Ai tole ma, olat ni dia huntion na mangolu on. Tongnama durum!” Angka pandohan on ma na somal haruar sian pamangan ni angka jolma na pervasif.

Pangalaho na pesimistik jala na pervasif pe tarida do i sian pangkataion di sadasada rapot, rupani. “Sojo bah, manat jolo tapingkiri!” Asal adong usul ni dongan, sai manigor pandohan i do na haruar. Hape, songon dia na manat ndang adong diadarhon. Pervasif do i. Na manat manundati do i.

Alani, tapangido jala tatuktuhi ma, sai na bungkaonNa do i! Molo porlu, manigor tagorgori api panutunganna, bo pe lali na naeng situtungon i habang dope marimpotimpot. Jala taingot ma, di pangujungi ni ende mardongan sipasingot na di ginjang i didok do: Ula… ula haumam!

Penulis: Albiner Siagian (Sahalak parhalado di HKBP Perumnas Simalingkar; Guru Etos dohot Revolusi Mental na marbisoloit)

BACA:  Khotbah Terbaik Seorang Bupati Taput

Facebook Comments

Default Comments

Leave a Reply

Your email address will not be published. Required fields are marked *