Serial Kearifan Batak (12): Ugasan Torop

Serial Kearifan Batak (12): Ugasan Torop

JAKARTA, BatakIndonesia.com — Angka dongan na hinaholongan. Ra, sude do hita hea umbegesa sarito na ribur on. Di sada huta di hitaan adong ma sada keluarga na mulak sian pangarantoan. Ala hurang denggan parngoluonna di tano parserahan i, mulak ma nasida tu bonapasogit. Sasintongna, nunga tubu di pangarantoan nasida.

Di sada tingki di manogot, andorang so borhat tu balian, mangopi ma amanta i di sada lapo. Adong ma pigapiga donganna ama di lapo i. Di na tongon nasida marsirarion, ro ma sahalak dakdanak mangalapi sada ama na di lapo i. Disungkun amanta sinangkinin ma amanta na nialapan i, mandok: “Ai ise tahe dakdanak i?” Dialusi amanta i ma: “Anakta do i bah!” “Bah, nunga bolon kedanmu, ate?”, ninna amanta na manungkun i huhut disirup hopina na martimpul i dope.

Ndang piga lelengnari, ro ma ripe ni amanta na hira sabulan dope naung mulak tu huta i mangalapi ibana tu lapo i. “Bang, ada tamu!”, ninna manggorahon sian alaman ni lapo i. Manigor disungkun sahalak amanta na hundul di jolona i ma ibana: “Ai ise do poang inanta na mangalapiho i?” “Istrinta to do i, bah!”, ninna ibana mangalusi burju! Manigor martata ma sude angka na minum na di lapo i, asing ni ibana. Hohom ibana, huhut sungkunsungkun rohana di bagasan.

Nantoari, di na marsirarion pigapiga halak ruas ni Grup Pesbuk, nuaeng on didok ma i kopi darat, manang boha ma mulana, dihatahon sasahalak ma hata on: “Ugasan Torop.” Manigor huingot ma sarito na ribur na di ginjang i. “Ingkon hugurithon Ugasan Torop i”, ima na ro tu rohangku. On ma ibana!

Mangihuthon angka pandebisuk, domu tu ugasan (ajang didok di Hata Karo), adong tolu horong ni ugasan (parnampunaon). Na parjolo ima private goods (ugasan mamulik). Deba na hombar tu horong on ima jabu, motor, dohot talipon-golom i. Na paduahon ima quasi-public goods (ugasan antarantar publik). Molo di Hata Indonesia didok ma i barang ecek-ecek publik, satonga privat jala satonga publik, hombar tu parpeakna. Parsinabun boi do sipata gabe barang privat molo ingkon pasahaton togutogu-ro manang pasituak-na-tonggina. Alai, molo tanggung jawab do i di paradaton dohot di pardongantubuon, barang publik ma i. Na parpudi ima public goods (barang publik). On ma na nidokna ugasan torop. Na masuk tu horong on, isara ni alogo, aek dohot lampu kongsi (sinondang ni bulan). Layanan kesehatan na sasintongna ugasan torop, nuaeng nunga gabe ugasan privat.

Mangihuthon pangantusion on, adong ma inganan torop (ruang publik), isara ni paradianan manang panisioan di topi dalan, dohot inganan privat (ruang privat), isara ni bagas manang alaman ni jabu i. Ala ni i ma umbahen na adong boaboa ‘dilarang masuk’ (Pasal Sol Sol Do, KUHAP) di harbangan ni jabu ni sasahalak parjabu.

Sasintongna, di Halak Batak, pandohan ugasan torop ndang apala marpardomuan tu haparnampunaon ni ugasan, alai pandohan na pataridahon sapartuturon manang sapanjouon do domu tu paradaton. Sisada tulang do na marhahamaranggi di partubuon. Alani didok ma tulangta. Songon i ma tong anakta, borunta, namborunta, amangborunta, helanta, parumaenta, pahompunta.

Molo sapunguan Halak Batak, isara ni di Sarikkat Marsiurupan (Punguan STM) manang di punguan na marharoroan sian huria (isara ni punguan koor), sai didok do nasida sisada anak dohot boru. Di ulaon adat sisada anak dohot sisada boru do nasida, bo pe asing be margana.

Ugasan torop boi do pataridahon solhot manang hormat ni parsaoran. “Sian dia hamu sintuanami?” “Bah, na ro do hamu gurunami?” “Horas panditanami!” Angka on ma deba ugasan torop na pataridahon solhot jala hormat ni panjouon.

Huria i, na sasintongna ugasan hadosan, nuaeng deba nunga maruba gabe ugasan mamulik (privat). Nunga adong huria (gareja) nampuna ni sasahalak. Sai songon CVna i dibahen.

Nuaeng on nunga lam maol angka pandohan ugasan torop i jumpang di panghataion siganup ari. On masa, ra, ala ‘pangago’ ni pangalaho individualis i. Hape, molo tadok do, rupani “Bah na imbaru motorta i, ate Laekku!”, sangga marmotor na imbaru dongan, na dialusi mandok “Tole ma Lae, pinardukketdukketan!”, ndang subang be roha manghunduli motorna i. I ma solhot ni pardonganon, laos dohot ma iba manghilala dohot ‘marnampuna’ di ugasan ni dongan.

Alani, une do hasomalhononta angka pandohan ugasan torop i di parsaoron siganup ari, tu na taut dohonon. Nunga diparade angka Ompunta Sijolojolo Tubui i di hita na gabe dalan pasolhothon parsaoran dohot mamparsaulihon parsaulian ni dongan, so tupa mangiburusa. Unang adong be pandita na mandok ‘sintuangkku’ manang sintua mandok ‘ruashu’, rupani.

Alai, huhut ni i, boha do hata ‘ripenta’ na nidok ni amanta na di ginjang i? Ndang ugasan torop i, bah! Sondo (sian hata sotung do) parparumaenon i, ate!

Penulis: Albiner Siagian (Sahalak parhalado di HKBP Perumnas Simalingkar; Guru Etos dohot Revolusi Mental na marbisoloit)

BACA:  Serial Kearifan Batak (13): Shared-Space and Sharing Understanding (1): Mamiu Tali Ijuk

Facebook Comments

Default Comments

Leave a Reply

Your email address will not be published. Required fields are marked *