Serial Kearifan Batak (13): Shared-Space and Sharing Understanding (1): Mamiu Tali Ijuk

Serial Kearifan Batak (13): Shared-Space and Sharing Understanding (1): Mamiu Tali Ijuk

JAKARTA, BatakIndonesia.com — Na ujui, uju di sihadakdanahonniba, huingot ma ahu dohot amongku sangga mamiu tali ijuk, bahen tali ni horbo, rahutrahut ni sige, tantan ni hudon di napaijur tuak, dohot lan na asing. Ulaon mamiu tali i somalna dipatupa di pantarpantar ni jabu empernami sangga ro udan. Boasa tingki ro udan? Alusna: mamparhaseang tingki. Ai lalu ma mulaulaon na asing, isara ni mangombak di balian manang manambori gadong di porlak, molo por udan. Alai, anggo mamiu tali ndang, ala boi do i niulahon huhut manisio di pantarpantar ni jabu i. Sada parsiajaran na arga: “Mamparhaseang tingki!”

Amongku ma anggo na mangeneti riman ni ijuk i laho pulosonhu. Lam ganjang ma antong tali i, pola sukkot iba mardalan mundur! Dung i nibalun ma jalo tali i tu piuan i asa himpu! Huhut manigati ijuk i, marende ma amongku nenget. Endena i do mulahulak: “Debata Baen Donganmi.”

“Debata baen donganmi, lao mangula ulaonmu
Baen Ibana haposanmu, jala serep rohami
Debata baen donganmi, Debata baen donganmi”

Minggu na ro i do tong diendehon. Alai, nangpe naung maos i diendehon, ndang apala pas loguna i diendehon, lumobi ma di baris parpudi i—Debata baen donganmi. Di ‘debata’ i do dibahen marlegato, ndang di ‘baen’ i. Dohot ma iba sipata mangendehon dohot inongku na tongon manjaljali gadong hau bahen indahan ni manuk.

Anggo ende ni inongku asing do. Sai endena na di par-Ari Kamisna i do diendehon:

“Aut marhabong-habong au, pintor lao tu surgo i. Tano on tadinghononhu, dohot si Maria i”

Parsiajaran na arga paduahon dohot patoluhon: “Mangula mangasahon Tuhan i huhut marpanghirimon na mangolu.” Ai tung so saburon ni paname i do boni i anggo so hirim rohana di eme na marlompit ganda sian boni i. Alani i ma mangula mangasahon Tuhan i.

Disi ma hami manghatahata i. Ragam nihataan disi. Sipata ma didok amongku: “Palu ma jo tepta i (mandok tape recorder) kedan! So marnasiang udan on! Gondang hasapi i baen da!” Nioloan do i bope hasoloan ni roha Trio Golden Heart dohot Manurung Sister do uju i! Sipata do jongjong songgot amongku laos diembashon satongkin, mangihuthon gondang hasapi na ‘marapipurun’ i. Di tingki na asing olo ma tong dipasiat pangidoanniba mamalu kaset ni Trio Golden Heart i. Diendehon si Dakka Hutagalung, Star Pangaribuan, dohot Ronald Tobing ma tongon sada sian Buku Endenta i: “O Tondi Parbadia i, bongoti rohanamibe, Ho sipatiur roha…”. (Catatan: Somalna, ganup sada album, sai disolothon Trio Golden Heart do sada ende huria. Diendehon nasida ma i dohot logu na ampit tu not ni Buku Ende i, diiringi tokkel dohot rambas ni gitar akustik na mansai lambok tu sipareon).

Taringot tu na mamalu tep i, adong do sarito na ribur na mantat poda disi. Ndang boi ganup tingki tep i paluon, ala diharhari amongku do batere kering i. Sangga mamalu pe i dipasuang! Parsiajaran na arga na paopathon dohot palimahon: “Masiargaan marhite na masipasiatan dohot marpanarihon tu ari marsogot.”

Angka dongan, mangihuthon angka pandebisuk, tung mansai ringkot ma taparade inganan dohot tingki (shared-space) di keluarga laho marsaor dohot marnonang tu saluhut pangisi ni bagas. Lam tahilala ma ringkotni lumobi di jaman nuaeng on. Hamajuon si saonari on manghorhon tu lam gale ni parsaoron di keluarga. Angka natoras tole mulaulaon maradu so disodar tingki naung borngin. Angka ianakhon lalap di parlalapanna, so adong na manganturehon. Inanta lalap martariktarihan (mararisan), amanta lalap marrapot di kantor. Ianakhon lalap marvideo-game sipat ni arian-borngin. Si boru ndang binoto ise baoa donganna mangadangi, si doli mangaluahon boru ni halak. Dakdanak na menek so di ingot martapian ala ndang lokkang sian na mar-game-talipon-pistarna i. Sasadasa pangunsandean i ma pangurupi (pembantu).

Hea dope tasungkun ianakhonta i, boha do parsingkolaanna? Dohot ise ibana mardongan? Hea do tasigat tas singkolana i manangna angka begu aha di bagasanna? Hea do disungkun inanta amanta i, huhut didappol tanggurungna i, manang na adong parsoalanna di kantor sangga songonna murhing bohina mulak tu jabu? Hea do amanta manungkun inanta i, boasa ndang diingot mangorui obukna naung janggejangge i? Hea do hita rap mangan? Hea do tadasdas ianakhonta i marsingkola minggu, martangiang, mandok mauliate? Hea do tapasabam rohana molo godang tinta mera di raporna i, so mandok: “Ai ho nama huroha na ummoto di tano on!?”

Ruang berbagi di keluarga mansai porlu di tingki on. I manghorhon tu asa unang masa be pandohan na mandok ‘hatam’, ‘hatamu’. Alai, naeng ma gabe ‘hatanta’. Dang be ‘dokmu’, alai ‘dokta’ nama. I ma na nidokna “sharing understanding”, na masiantusan.

Alani i, taparadema inganan dohot tingki (shared-space) marsaor dohot sude pangisi ni bagasta laho mangeahi na marsiparsangapan dohot na marsiantusan (sharing understanding).

Penulis: Albiner Siagian (Sahalak parhalado di HKBP Perumnas Simalingkar; Guru Etos dohot Revolusi Mental na marbisoloit)

BACA:  Absurditas Berpikir di Ruang Publik

Facebook Comments

Default Comments

Leave a Reply

Your email address will not be published. Required fields are marked *