Serial Kearifan Batak (7): Budaya Malu dan Bersalah Menurut Orang Batak

Serial Kearifan Batak (7): Budaya Malu dan Bersalah Menurut Orang Batak

JAKARTA, BatakIndonesia.com — “Nunga gotap huroha urat ilana! Tung songon hapal ni laklak ni pokki i ma hapal ni bohina!”, ninna sada dongan uju manonton sahalak panangko hepeng ni negara na sai tongtong martatata suping di televisi. Nangpe naung gari di tangganna jala marpahean KPK, na keleurna songon keleur ni hua ni unte jungga i, sai tong do disorohon ibana mekkel suping tu angka wartawan na manarunggui ibana, hira na so adong salana. Ndang adong ilana agia saotik pe.

Adong muse do na asing na so hurang loakna. Dung ruar sada pangemor arta ni negara (koruptor) sian hurungan, nunga tung torop angka siseanna manomu huhut manjangkon haruruarna di duru ni penjara i. Sai hira pahlawan parsidamdam do sangapna idaon dibahen angka siseanna i. Pola dipahebaheba lumiat bius. Molo nunga songon on, ndang apala tangkasbe botoon ise do na so umboto ila.

Domu tu na so umboto ila on, dung hugurithon sarito taringot tu hasangapon na margoar ‘Honores mutant mores’ di sitalpas halinu (media sosial) on, dipangido sahalak panjaha ma asa hugurithon taringot tu ‘Shame Culture’ dohot ‘Guilt Culture’ ni si Ruth Bennedict dipadomu tu adat ni halak Batak na marpardomuan tu hailaon tu pangalaho manang parulaon na so denggan.

Si Ruth Bennedict ima sahalak parhapistaran Antropologi Budaya na manigati angka pangalaho ila dohot sala di torop bangso. Mangihuthon Ruth Bennedict, adong dua rumang ni jolma (masyarakat) domu tu parulaon na sala, ima budaya sala (guilt culture) dohot budaya ila (shame culture).

Budaya sala (guilt culture) ima sada pangantusion (konsep) di na masyarakat na manghasomalhon panghilalaan na marsala di pangalaho dohot parulaon na dihaporseai ibana (nasida) ndang dihalomohon donganna. Hasomalan na songon i ma manungguli manang paingothon ibana (nasida) sangga mangulahon manang tarsung mangulahon angka ragam ni hasalaan, isara ni na manggolaphon arta ni negara. Alani ma somal tabege barita sada pejabat na mansohot-sandiri sian ulaonna molo mangulahon hasalaan. Mangihuthon Ruth Bennedict, Bangso Amerika masuk ma tu horong budaya sala on.

Ia budaya ila ima pangalaho napasomalhon panghilalaan na maila di angka parulaon na so gabeak, na so denggan, manang na hurang tau di angka siulaon. Pangantusion on marharoroan sian sahala ni hadirion dohot hasangapon (pride and honor). Pangalaho na songon on somal do masa di Bangso Japang. Tarbaritado pandohan ‘harakiri’ di halak Japang, na mangujungi ngoluna molo talu di parporangan. Pangalaho i marbonsir sian panghilalaan na mansai maila di na talu nasida di parporangan i. On patuduhon hasatiaon jala kebanggaan tu bangsona. Alani, ganup ulaon na so manghorhon kebanggaan tu bangsona, hosa ma alona. Hombar tuson, mangihuthon Bennedict, Bangso Japang masuk ma tu horong budaya ila.

Ndang apala binoto masuk tu horong dia ma bangsonta. Na niantusan, ndang masuk tu horong na dua i. Adong do nuaeng di bangsonta on parpunguan na mansai sangap diuluhon sada halak na so umboto ila, na so umboto adat dohot etika. Na lam mambahen suda roha, ruas ni punguan i do mandok ibana na so maradat dohot na so maretika, hape laos nasida do pabangkit ibana gabe uluan nasida. Tu horong dia ma pahombaronta pangalaho on, ate!? Memang, nuaeng on, ndang Indonesia goarna molo so suhar!

Boha ma muse molo di Bangso Batak? Huhilala, sapandapot do hita molo hudok ndang adong ubana pangalahon on di halak Batak di nuaeng on. Nunga tung torop halak Batak na so umboto magona dohot ilana. Nuaeng on, torop do halak Batak na sala mangalapati falsafah hidup Bangso Batak.

‘Halak Batak Anak ni Raja do’ dohot ‘Metmet pe Sihapor Dijujung do Baringinna’ dilapati dohot na so tupa munsat agia sadopa ahape na masa, nangpe tarjolung sala. Sitokka patuduhon hailaon, sitokka mangokkuhon hasalaan, lumobi di tonga ni mangajana. Molo naung binondut sitokka ma niutahon. Sasintongna, ndang songon i pangantusion ni angka pandohan i. Anak ni Raja marlapatan ‘raja’ di angka panghataion dohot parulaon, dohot ma di angka na mangokkuhon hahurangan (kestaria). Na ‘raja’ do jolma (Batak) molo manghilala sai na adong do hahuranganna, ai parbahulbahul na bolon do halak Batak.

Pandohan ‘naung nibondut unang ma niutahon’ mangondolhon asa unang neangneang manghatai manang mulaulaon. Manjujung baringin ndang marlapatan manghokhop parulaon sahat tu na maliklik saboha pe hurangna manang salana. Dondon pate di angka jabatan bope ndang manghorhon tu hadengganon parulaonna disi, ima tanda ni na so adong budaya ila manang budaya sala.

Pangalaho na songon on tarboanboan do tu huria i. Ndang apala tumpol huria i manjua pangalaho na so songon on. Hira boi do pangalaho on ‘tarjalo roha’ ala dihukkupi angka pambahenan na ‘denggan’, isara ni angka panumpahion tu ulaon huria. Masa ma siida bohi, ndang siida roha! Dirgak ma tong simanjujung bope godang hahurangan!

Penulis: Albiner Siagian (Sahalak parhalado di HKBP Perumnas Simalingkar; Guru Etos dohot Revolusi Mental na marbisoloit)

BACA:  Perihal Jabatan Akademik Profesor - Bagian 1

Facebook Comments

Default Comments

Leave a Reply

Your email address will not be published. Required fields are marked *