Serial Kearifan Batak (9): Sibaran Lapalapa

Serial Kearifan Batak (9): Sibaran Lapalapa

JAKARTA, BatakIndonesia.com — Adongdo ende Batak na hira dos parirna tu ende ni Amanta Hamdan Attamimi, ‘Termiskin di Dunia’. Nunga pogos tariluilu muse (Aku merasa orang termiskin di dunia, yang penuh derita bermandikan air mata). Ndang apala huingotbe goar ni ende dohot na patomutomuhon, alai anggo hatahatana, loguna, dohot na mangendehon huingot dope.

Memang, ndang dos tema ni ende na dua i. Molo ende Termiskin di Dunia marsarito taringot tu parsorion ni baoa na pogos na so pulut rohana manjalo holong ni sada anakboru ala dihilala rohana tung so hombar do ibana mardongan, lumobi gabe mardongan saripe, dohot anakboru i, ala ni pogosna. Ende Batak i patubegehon parir ni parngoluon ni sada halak na disaritohon di ende i. Jaha hamu ma hatahata ni ende i, na niendehon ni Eddy Silitonga, husurathon di toru on, singkop, ianggo so perek ilumu:

Hulului do dalan
Na lao parbodarian
Sude marsidalian
Ala ni hapogoson

Tu ise sungkunonku
Pangalualuanku
Pandokkon ni sibaran
Ikkon jaloon bagian

Reff
Hapogoson na tarlobi da inang
Na mambahen gabe tarhirim rohami
Hangalanki, hangalanki, tahee..

Mulak tu ayat 2!

Boha, hirahira? Parir do, ndang i do?

Na manggoit pikiranku di ende i, ima dua baris parpudi di ayat dua i: Pandokkon ni sibaran ingkon jaloon bagian. Sai jojot do sibaran on gabe hambing na birong di angka ragam ni parungkilon, lumobi ma tu namandiori ngolungolu dohot rongkap. Sai jojot do sibaran disalahon sai hira sibaran i (ndang Sibarani, santabi di angka tulangku Sibarani) do na maniop tampuk ni rejeki manang rongkapna, umbahen na didok, “Pandongkon ni sibaran ingkon jaloon bagian!” Ra, somal do tabege pandohan ‘sibaran lapalapa’, na manggombarhon jut ni roha marnida sibaran i. Ai tung manang begu aha huroha huaso ni sibaran i mangatur panjampalan dohot rongkapni jolma.

Lam marsongit ma muse molo dipadomu sibaran i dohot hangalan. Di ende na asing didok Eddy Silitonga do songon on: Inang pangintubu/husungkun ma dainang/godangni parsorion/di ahu anakmon/aha do hangalanmu, uju ahu di bortian/margogo ijur bari/da luluankunama i. Daona i ate, di haparironta sinuaeng ingkon pangidoon pertanggungjawaban tu hangalan ni inongta uju pahandithandit hita sia bulan di bortianna i. (Huhutna, taboto do hangalan tahe? Hangalan ima sada pangidoan ni roha manang na diottom roha na so tupa (tak terwujud). Molo pangidoan i tingki denggan pamatang, isarani giot manganhon bilalang ni manuk mira polin (jotjot ndang diultophon, sai dipeoppeop di bagas rohana), gabe hangalanma i.)

Molo di ende boi ma i songon dalan mendramatisir parsorion i. Alai di parngoluon siapari ndang boi talu hita tu sibaran, hangalan, dohot turpuk manang nasib. Di sada tingki, marpidato ma sahalak saudagar na mora jong na so timbo sikolana alai tung mansai marhasil di usahona di joloni na torop di sada parsikolaan na timbo. Alani ma sai jotjot ibana dipio laho patubegehon pengalamanna sahat tu na marhasil. Adong ma sian natorop i manungkun: “Aha do rahasiani hasuksesonna i? Dialusi saudagari ma: “Pinangido tu sude hamu asa mangalipat jari tanganna songonna martangiang! Dung i, tilik hamuma tu talapak tanganmuna i. Ndang di garis tangan i! Alai di golomni tangan i do, huhut dipaulak ibana dilipat tanganna. Sukses ada di genggaman tangan (kerja keras), bukan di garis telapak tangan. Naumporlu sian i, ninna ibana manambai huhut hot dilipat ibana jarinai songon na martangiang: “Paloas Tuhan i mangula di ngolum!”. Martelapma sude na torop i umbege alus ni saudagar si partangiang i.

Angka dongan, angka parhapistaran mandok hasukseson marharoroan sian pikiran (mindset). Molo manigor mandeledo pikiran i mandok ndang turpukta hamoraon, ndang bagianta i, ba songon i ma hasilna, marpogosma. On ma nanidokna pamikkirion dondon pate (fixed mindset). Hape, Amanta Carol Dweck, sahalak gurubolon sian Univeritas Stanford, Amerika Serikat, mandok: “Pola pikir i boido magodang (growth mindset). Ndang na turpuk na pogos, usahodo na gale. Ndang alani marhangalan inongta uju di bortian hita, hagigihontado na alang, ndang alani sibaran lapalapa, hajugulonta marusaho do na rimpong.

Alani, taharinggashon jala tahajugulhon ma na mandiori ngolungolu i so pola hatop mandele na mandok “Pandokkon ni sibaran, ingkon jaloon bagian!”

Penulis: Albiner Siagian (Sahalak parhalado di HKBP Perumnas Simalingkar; Guru Etos dohot Revolusi Mental na marbisoloit)

BACA:  Sains Itu Bebas Politik

Facebook Comments

Default Comments

Leave a Reply

Your email address will not be published. Required fields are marked *