Serial Kearifan Batak (2): Burju na Tolu

Serial Kearifan Batak (2): Burju na Tolu

Pidong ambaroba, pidong ni Toba
Nang pidong si ruba, pidong harangan
Na burju marroha, dapotan poda
Na burju mangula, na butong mangan

Adong do ende ni natoras dohot ianakhon na marsialusan na diajarhon angka natuatua manang ompunta na parjolo i. Mansai denggan do i endehonon ni natoras, lumobi ma angka natoras naposo, dohot ianakhonna ganup ari. Endei i ma na husurathon di ginjang i. Ra, torop do hita umbotosa mangendehon i. I ma ende ni natoras. Dungkonni, dialusi ianakhon ma huhut mangendehon:

Marsingkola au amang, dohot ho ale inang
Unang jolo suru au, mangula hauma i
Ai na metmet dope au, ndang tarula au dope
Holan marsingkola do, ulaonku na tama, d.u.

Mangingot ende na dua i, sasintongna adong tolu poda na gabe hadirion ni halak Batak, ima na burju marroha, na burju mulaulaon, dohot na burju singkola. I ma na hudok ‘Burju na Tolu’ ni halak Batak na gabe goar ni sarito on

Di na paima kareta api ahu lao tugas tu Tanjung Bale, di manogot ni ari (Kamis, 03/06/2016), ala magirahu ahu sahat tu stasiun i, husangahon ma minum tes di toru ni jambatan panariparan na di jolo ni sitasiun i. Tongon ma pukul tonga onom manogot hatiha i. “Hubege ma hata ni sahalak na hundul di lambungku tu donganna, mandok: “Eee, jambang ulu! Ia mangan ho gogo, alai karejo soinama jambang ni ulum!”.

Manigor hupeop ma pandohan i. I do tahe! Na so ra mulaulaon, unang ma mangan! Ai haru sarindan, na marungkil do ibana boi sangkot di ranting ni joring i, gabe sian i ibana mangan!

Tutu angka na padot do ompunta na parjolo i. Tarida do i sian angka pandohan, isara ni pukpuk holiholi, marrenteng lanok di tanggurung, hir hodok, maheu daging, tano tombangan, dohot lan na asing. Angka i patuduhon halak Batak mansai padot mulaulaon.

Alani, angka dongan, tatiru ma padot ni angka ompunta i mulaulaon. Gariada lumobi sian i ma, alana nunga tumimboan singkolanta sian nasida. Nunga ingkon lobi mangantusi hita ruhutruhut ni parkarejoan.

Di ujung ni Buku Endenta i (BE No 373), andorang so Haluaon na Gok, didok do, jala laos taendehon ma:

Mangula hita jolma, manabur boni i
Alai anggo jadina, di Debata do i
Dilehon las ni ari, nang nambur udan pe
Tongtong dipanumpakna, marguru sasude
Nasa ulibasa, ro sian Debata
I pe ibana pujma, huhut haposi da

Ampit ma i tu hata ni parTessalonika i: “Na so ra mulaulaon, unang ma ibana mangan!”

Taparrohahon ma!

 

BACA:  Khotbah Terbaik Seorang Bupati Taput

Penulis: Albiner Siagian (Sahalak parhalado di HKBP Perumnas Simalingkar; Guru Etos dohot Revolusi Mental na marbisoloit)

Facebook Comments

Default Comments

Leave a Reply

Your email address will not be published. Required fields are marked *