Serial Kearifan Batak (5): Parbahulbahul na Bolon

Serial Kearifan Batak (5): Parbahulbahul na Bolon

JAKARTA, BatakIndonesia.com — Angka dongan na hinaholongan! Adong do pandohan na mansai singkop manggobarhon harajaon dohot haulion ni pangalaho ni sahalak manisia di Bangso Batak, i ma ‘parbahulbahul na bolon’. Nang pe pandohan i pataridahon hamoraon di sinadongan, alai anggo tudos na ima sahalak na mansai uli parangena jala lambas rohana. Tung sude ma tahe rumang ni hadengganon jumpang di halak si parbahulbahul na bolon.

Tatangkasi ma jolo parjolo bahulbahul na bolon i. Bahulbahul ima parrasan na bolon isian ni eme. Parrasan dipauli sian baion na niletek, hundulanna i tikko. Adong ma parrasan na bolon adong na menek. Parrasan na bolon i ma bahulbahul.

Ndung dijomur eme i mansai horing dipamasuk ma tu bahulbahul di sokkor-pudi ni jabu ruma manang sopo. Lam bolon bahulbahul i lam tarida ma parbagas i pareme. Molo martamue sada halak tu jabu ni donganna manang tondongna sai diserbeng do manaili tu sokkor, boha jongjong dope bahulbahul i manang naung sorpi do. Molo jongjong dope, i pataridahon na gok dope eme disi.

Bahulbahul na bolon na tong sai jongjong nang pe di haleon ima diririt ompunta gabe tudosan tu jolma si parlambas roha, jolma na halomoan dohot na haposan. Bahulbahul manggombarhon pangaradeon dohot na sari di ari marsogot.

Molo pinahusorhusor sian suhi ni ilmu kepemimpinan sinuaeng, tung mansai malo do ompunta na jolo mamillit pandohan i. Bahulbahul na bolon manggobarhon hatongamon (kewibawaan) ni sahalak uluan na hot jala tingkos di padan dohot uhum (bahulbahul na bolon na gok eme mansai hot do i juguk jala tingkos jongjong ala tipak hundulanna jala mesek eme i di bagasanna). Tung so jadi do i tunggaling i tung pe ro lalo na bolon. Ra, uluan parbahulbahul na bolon on ma na nidokna Si Jujur ni Ninggor Si Tingkos ni Ari.

Somal do pandohan Parbahulbahul na Bolon on dipadomu dohot pandohan Paramak so Balunon Partataring so Ra Mintop, Parsakkalan so ra Mahiang. Molo tupa uluan na songon on tung apala singkop ma haulionna. Di hata Indonesia manang hata Sileban didok ma i Pemimpin yang Bijaksana, Murah Hati, Mengayomi, Servant Leader, manang Humble and Generous Leader!

Domu tu kising na gabe uluan manang pargonggom di bangsonta on, tung mansai une ma molo na tarpiliit i parbahulbahul na bolon. Jala, rumang ni uluan manang pargonggom na parbahulbahul na bolon i tarida do di pangalaho ni amanta na lihi i saleleng manggonggomi bangso on ibana na sailaon. Tung so pola ringkot paboaboaonta molo tung adong nauli na tabahen tu ibana. Nunga dipeop ibana hian i di bagas roha na na lambas i dohot di bahulbahulna na bolon i.

Penulis: Albiner Siagian (Sahalak parhalado di HKBP Perumnas Simalingkar; Guru Etos dohot Revolusi Mental na marbisoloit)

BACA:  Sosok Gubernur Sumut yang Berteluk Belanga dan Berkopiah Merah ke Mana-mana

Facebook Comments

Default Comments

Leave a Reply

Your email address will not be published. Required fields are marked *