Serial Kearifan Batak (6): Viele Händle Macht Leicht Arbeit (Lam Torop Botohon Lam Neang Ulaon)

Serial Kearifan Batak (6): Viele Händle Macht Leicht Arbeit (Lam Torop Botohon Lam Neang Ulaon)

JAKARTA, BatakIndonesia.com — Di manogot on (Kamis, 30 Juni 2016, pukul 8.35 WIB), sangga mangopi di sada lapo dingkan Sumber Padang Bulan Medan, tarjaha ahu ma barita sian alealeniba Pandita Pramono Hasibuan. Goar ni baritana ima na gabe judul ni sarito on. Manigor hudokma mangantoi “Mansai uli perumpamaan i panditanami. Parmisi ma jolo asa hupaganjang sarito i di bilut bariba an!”

Viele Händle Macht Leicht Arbeit. Sian hatahatana i, tontu sian hata Jerman ma i. Di hata Inggris didok ma i ‘Many hands make light work’. Molo di hata Batak umpama i marlapatan ‘Lam torop botohon, lam neang ulaon’. Gotong royong ma i di hata Indonesia.

Molo di hita Batak, mulaulaon na songon i ndang ‘tanda sukarno’be. Nunga tung tangkas i di hangoluhon angka ompunta. Sian hita na di loloan on pe, ra, hea do marsiadapari.

Marsiadapari ima na marsiurupan marsoringsoring mangula hauma, pajongjong bagas, manang mangulahon ulaon adat. Neang ma antong ulaon i ala nunga torop botohon mangulahonsa.

Adong muse do na tudos tu na marsiadapari ima marsirippa. Molo marsiadapari, marsoringsoring ma i hombar tu tingkina. Molo sadarion mangula di sabaniba, marsogot di saba ni dongan. Songon i ma marsoringsoring tu ari na mangihut. Marsirippa ima na rap mangula di ulaon na marhadomuan tu haporluan ni saluhut, isara ni pature dalan manang manggadu bondar.

Di na marsiadapari, hira so hinilala do loja molo torop dongan mangombakhon sakkul i. Huhut ma marsirarion disi, sipata ma masiursaman.

Domu tu na marsiadapari i, adong do sarito na ribur ujui. Di sada tingki, di tingki na mangombak balik hauma angka parsiadapari, masipaboaan ma nasida di angka ‘huasona’ maradophon ripena. Amanta na sada mandok: “Anggo ahu, molo dung sidung martapian bodarina i, manigor didappol inanta do.” Amanta na sadanari mandok: “Molo ndang rade sagalas kopi dohot sigaret manogot i, unang ma jadi!” Na debanari mandok: “Ganup borngin rade ma dua pira ni manuk na hinobolan dohot aek las paridionku.” “Anggo Ama ni Peranca, nunga hutanda i! Dung mulak annon ibana sian balian on, mamele pinahan lobu dope huhut manggorgori paridion ni inanta i. Molo ndang, di paimpisan ni tarup i ma ibana modom! Boha ma amama DKI”, ninna nasida huhut margahargak mangursamhon.

Alai, sai hohom do Ama ni Peranca pabegebegehon angka sigodang hata i. Tung so dihaporseai ibana do i agia saotik pe. “Nunga hutanda ho sadasada! Angka parbulbul do hamu! Anggo sahalion parsudam ma bahenonhu”, ninna di bagasan rohana.

Di sada tingki sangga mangombak nasida di hauma ni Ama ni Peranca, didok amantai ma tu ripena sangga ro manaruhon tugo: “Ma, sotung lupa ho paradehon aek las paridionku! Bege, nunga habis, ra, miak dappol i! Sotung so dituhor ho!” Manigor dialusi inantai ma: “Ai asing ho pa, pola dison dihatahon ho i, sai hira na so somal i pinarade. Tenang ma ho, nunga rade i!

Manigor hohom ma angka amanta na asing umbegesa i, ai tung so dirippu nasida songon i ‘jago’ ni Ama ni Peranca.

Alai, mangiburu ma sahalak amanta di ‘hajagoon’ ni Ama ni Peranca i. “Asa diboto ho, lobi sian ho ahu! Painte da!”, ninna di bagas rohana.

Jumpang ma tingkina marsiadapari di hauma ni amanta na mangiburu i. Di na naeng mulak inantai dung manaruhon tugo, didok ibana ma songon on: “Ee.. Omak ni Bongguk, sotung so diloppa ho paridionku da! Bilalang ni manuk i pe sotung so dipasuhi ho!” Manigor dialusi inantai ma gogo: “Paridion nimmu? Ndang sadiharingku i! Di bondar an ho maridi! Haru pinahan lobu so pinaridi dope! Pajonajonahon ho!” “Muse, bilalang ni manuk dope nimmu, haru barimbingna so adong”, ninna inanta i marbetebete huhut dilangkahon mulak. Marrara ma bohi ni Ama ni Bongguk umbegesa i ala ni ilana. Satonga mate ma angka amanta i margahargak pola hansit gontingna. Diboto hamu do? Ai na marsandiwara do Ama ni Peranca dohot inanta i, datung hea tupa na songon i.

Mulak ma hita tu na marsiadapari i. Nuaeng on, nunga tung masihol hita marnida na marsiadapari, na marsiurupan. Di ulaon adat pe, ndang masa be na marhobas. Nunga dipasahat tu ‘boru na burju’. Di hitaan pe, nunga masa na mar’catering’. Ndang masa be na rap mamboan amak laho inganan hundul di ulaon adat. Ndang adong be tenda kongsi. ‘Simple’, ninna. Hape, na marhobas i do sada hasurungan ni adat Batak.

Bangsonta on pe nunga tung pogos di na marsiurupuan, na margotongroyong. Alani ma, Amanta Porasiden Jokowi paingothon hita asa radot di na margotongroyong i marhite revolusi mental. Sada ojahan ni revolusi mental ima gotong royong. Na duanari ima integritas dohot etos kerja. Alani, taradoti ma na marsiadapari dohot marsirippa i!

Penulis: Albiner Siagian (Sahalak parhalado di HKBP Perumnas Simalingkar; Guru Etos dohot Revolusi Mental na marbisoloit)

BACA:  Keterpaduan Dalam Pemulihan Ekonomi

Facebook Comments

Default Comments

Leave a Reply

Your email address will not be published. Required fields are marked *