TAINGOT TAINGOT BARITA NI TANO PONGGOL
Di parbinsar ni mataniari boho 17 Maret 1906
Hurharma nasa pinggol di Samosir,
Panggu, linggis dohot tuhil mambuhar batu,
Mamonggol rungkung ni Samosir
Unang mardomu tu bona ni Pusuk Buhit.
Marratus pangisi ni luat i
Dipaksa Bolanda marrodi,
Sian manogot tu botari,
Marabur hodok, mangullus hoi
Ditinggang las ni ari.
Hundul di hurosi do mandur Bolanda i marlinggomhon baringin,
Didorguk hopi marsaor susu ni horbo.
Sipata jongjong mandur i martahuluk timbatimba,
Marsipatu tinggi naniop lingsinglingsing
Dipatonggor matana margogo soara
Manghurpasi parrodi mangkudus ulaon.
Tutuma gotap rungkung ni Samosir,
Mardomu aek Tao Silalahi tu Tao Nainggolan,
Marhujingjangma lasroha ni Gomponi.
Alai hirma hodok ni Ompu Babiat Situmorang
Ndang muramurabe pajumpang dohot Sisingamangaraja,
Natong mutungroha,
Olat ni magotap rungkung Samosir,
Holan di Dairi ma ibana manontang Bolanda.
Humalaput ma antong mayor Christoffel mamboan pasukan marsose
Mangalutung Sisingamangraja naung tarsosak di tombak Sionomhudon,
Mabugang ibana jala tartangkup,
Dipulos jala disongkik rungkungna gabe toshosa.
O tahe, diponggol rungkung ni Samosir,
Dung i disongkik rungkung ni Sisingamangaraja.
Taingot, taingotma i unang lupa
O hamu angka napantas marroha.
Ambassador Mangasi Sihombing (mantan Duta Besar)
NB: Ini tanggapan tu guritgurit ni Lae Panusunan Simanjuntak.
Baca Juga:
1 thought on “Taingot Taingot Barita ni Tano Ponggol”